Feijóo tenta lavar as declaracións do alcalde de Madrid sobre o tenista antivacinas Novak Djokovic

O presidente da Xunta, Alberto Núñez Feijóo, esgrimiu que, aínda que considera "irresponsable" a calquera dirixente político que "desatenda" a ciencia, aos médicos e aos expertos en relación ao beneficio de vacinarse, considera que o alcalde de Madrid, o tamén popular José Luís Martínez-Almeida, só se refería ao peso deportivo do tenista serbio Novak Djokovic ao definilo como "un gran reclamo" para a capital de España.

Ademais, afirmou que a decisión acerca da entrada en España do tenista serbio para xogar no Mutua Madrid Open corresponde ao Goberno central, que ten as competencias, e en segundo termo, ás normas que regulen o torneo.

"Djokovic e Nadal son os mellores xogadores do mundo en tenis. A calquera torneo gustaríalle que xogase Djokovic", argumentou Feijóo, quen interpretou neste contexto as palabras do alcalde de Madrid, que asegurou que o tenista serbio sería "un gran reclamo" para o torneo madrileño.

"Que Djokovic estea nun torneo de tenis en Madrid significa maior protagonismo e impacto deportivo. O que corresponde ás autoridades estatais é saber se pode xogar ou non nun torneo español, son competencias exclusivas do Goberno, aínda que na pandemia non as exerceu como debería", engadiu.

Máis aló, remarcou que a súa "opinión persoal" sobre vacinarse é "moi coñecida". "Teño clarísimo que un dirixente político que desatenda as propostas da ciencia e dos médicos é un dirixente político irresponsable", esgrimiu.

"Se os epidemiólogos, inmunólogos e preventivistas están a dicirnos que a vacina é a ferramenta máis potente contra a pandemia, o lóxico é que os políticos pidamos que a xente se vacine e que en determinadas actividades se requira a vacina para poder interactuar e poder traballar", defendeu, antes de insistir en que a decisión sobre Djokovic non é autonómica, senón estatal.

O GOBERNO TRASLADOU QUE DEBE VACINARSE

Precisamente, nesta mesma xornada o Goberno central advertiu ao tenista Novak Djokovic que se quere entrar en España desde Serbia, o seu país natal, debe vacinarse contra o coronavirus, xa que as normas recollen esta obriga ao tratarse dun país que está fóra do espazo Schengen, segundo indicaron fontes de Moncloa.

A normativa española recolle esta obriga, pero inclúe tamén unha excepción á que se podería acoller o deportista e que afecta aos "traballadores altamente cualificados cuxa labor sexa necesaria e non poida ser posposta ou realizada a distancia, incluíndo os participantes en probas deportivas de alto nivel que teñan lugar en España", tal como recolle o Ministerio de Asuntos Exteriores na web da embaixada de España en Serbia.

Desde Moncloa puntualizan ademais que o torneo no que podería participar Djokovic, pode establecer medidas máis estritas, incluída a obrigatoriedade da vacinación, dentro das normas xerais do país.

O debate ao redor da posible chegada do tenista a España iniciou este luns, cando o presidente do Goberno Pedro Sánchez afirmou que se o tenista quere xogar o Mutua de Madrid Open terá que "cumprir coas normas" igual que calquera outra persoa.

Estas declaracións producíronse despois de que o alcalde de Madrid, José Luís Martínez Almeida sostivese que Djokovic sería "un gran reclamo" para o Mutua Madrid Open, torneo que se celebrará do 26 de abril ao 8 de maio en Madrid posto que segue sendo o número un do mundo malia ser expulsado de Australia por non contar coa vacina e de que Francia xa adiantase que non poderá participar en Roland Garros.