Feijóo ábrese a eliminar "parte" ou "todas" as restricións cando se supere o pico
Avoga pola cautela e empraza á semana que vén porque "aínda é pronto" para ratificar que a curva de contaxios se dobra en Galicia.
- O protocolo para o Entroido establecerá "medidas básicas" e será de aplicación "en todo caso"
- Feijóo responsabiliza o sistema de 'autodiagnóstico' da propia Xunta pola alza dos casos activos
Por Europa Press / Redacción | SANTIAGO DE COMPOSTELA | 20/01/2022 | Actualizada ás 17:04
O presidente da Xunta, Alberto Núñez Feijóo, avanzou que, se se confirma que o pico da sexta onda se superou en Galicia e que os contaxios de covid-19 baixan "de forma constante e notoria", o Executivo autonómico "tomará decisións en consecuencia" a semana próxima, deixando a porta aberta a "deixar sen efecto parte" das restricións en vigor ou incluso "todas" elas.
Así o manifestou na rolda de prensa posterior ao Consello da Xunta, onde reivindicou que Galicia é "das comunidades con menos limitacións" en relación ás medidas de prevención fronte á covid-19, xa que non afectan a "ningunha actividade industrial, de servizos ou comercial en servizo amplo".
Si aludiu ás restricións adoptadas antes de Fin de Ano en hostalaría e lecer nocturno (no ámbito de horarios ou o uso de barras), que definiu como "puntualizacións". Tamén vixente, aínda que revisado recentemente, segue o toque de queda que limita as reunións de non conviventes os fins de semana.
En todo caso, na súa intervención manifestou que, a data deste xoves "aínda é pronto" para confirmar que Galicia deixou atrás o pico da sexta onda da pandemia de covid-19 porque a situación "non é homoxénea" na Comunidade e remitiu á necesidade de "esperar á próxima semana".
"Esperaremos á próxima semana para comprobar se o descenso da incidencia diaria de activos continúa e podemos dar por finalizado o pico", sentenciou na rolda de prensa posterior ao Consello da Xunta, na que ratificou que "hai indicadores" que "acreditan" que este pico podería quedar atrás, pero aínda ve preciso "esperar varios días para ratificalo".
Así, está previsto que a principios da próxima semana se reúna o equipo experto que asesora a Xunta fronte á pandemia para analizar a situación e adoptar decisións en consecuencia, en relación ás medidas que agora mesmo funcionan en Galicia. A data habitual de reunión dos comités adoita ser os martes, aínda que se viu alterada en ocasións.
"HAI QUE SER PRUDENTES"
O presidente esgrimiu que Galicia segue traballando tamén coa ferramenta da vacinación e relativizou os datos de incidencia que se manexan no ámbito estatal, tendo en conta que afeou que hai comunidades que non notifican os positivos diagnosticados a través en test de antíxenos, polo que a comparación perde sentido.
De feito, ratificou o peso dos miles de autodeclaracións e positivos confirmados por test de antíxenos en Galicia, á vez que reafirmou que, en todo caso, para a Administración autonómica o "importante" é diagnosticar para poder frear os contaxios e tamén controlar os calendarios de vacinación daquelas persoas que resultan infectadas.
E finalmente insistiu en que "hai que ser prudentes" e, na liña do que xa manifestara a semana pasada, rexeitou que se poida "aprobar por decreto" a "gripalización" da covid-19 ou tratar deste xeito o virus pola mera "declaración dun político".
