BNG pide ao Goberno que aclare as súas "intencións" sobre a subestación eléctrica de Abegondo
Os nacionalistas volven preguntar polo estado do proxecto trala solicitude de tramitación para a instalación do Parque Eólico Caíño.
Por E.P. | VIGO | 04/04/2022 | Actualizada ás 17:38
O deputado do Bloque Nacionalista Galego (BNG), Néstor Rego, rexistrou novas iniciativas para coñecer a situación de tramitación da subestación eléctrica de Abegondo e se se iniciará un novo procedemento con exposición pública incluída que permita coñecer a localización definitiva que se propón para un proxecto que ten un "importante impacto" para a veciñanza das zonas afectadas.
Por iso, pediu ao Goberno "transparencia" e que informe sobre as súas "intencións" no proceso para que clarifique se autorizará unha liña de evacuación cara esta suposta subestación, que está "sen autorizar" e que non se inclúe no plan de rede de transporte de enerxía eléctrica 2021-2026.
Tal como recolle o BNG nun comunicado, coa solicitude de tramitación para a instalación do Parque Eólico Caíño (que afectaría os concellos de Aranga, Curtis, Oza-Cesuras, Sobrado, Abegondo e Guitiriz) dáse por feito a existencia dunha futura subestación en Abegondo. Por iso, os nacionalistas volven preguntar polo estado de tramitación do devandito proxecto, lembrando que non se completou no seu momento a tramitación xa que, a pesar de que en 2016 foi publicado o proxecto, o proceso quedou paralizado tras consultar coas distintas administracións públicas afectadas.
"Quedou paralizado sen que chegase a publicarse o estudo de impacto ambiental nin a solicitude de autorización administrativa e sen que, por suposto, chegase a haber algunha solución sobre o asunto", indicou Rego.
Derivado dese suceso, descoñécese o seu emprazamento definitivo e tampouco se sabe "nada" sobre a súa viabilidade e execución. "A pesar disto, a promotora da subestación dá por suposto que a localización será unha das tres alternativas baralladas inicialmente en 2016. Ademais, curiosamente esta situación varía da proposta noutros proxectos eólicos que tamén se atopan en tramitación", subliñou Rego.
Por todo iso, o deputado quere coñecer en que situación se atopa a tramitación da subestación xa que non se recolle na planificación de rede eléctrica, pero si se fai mención á posibilidade de ampliar a que xa existe no Mesón do Vento.
