Presentadas alegacións á revisión do Manual de Reformas de Vehículos por parte de autocaravanistas galegos

A Asociación Galega de Autocaravanas (AGA) presentou alegacións á revisión do Manual de Reformas de Vehículos promovido polo Ministerio de Industria, Comercio e Turismo.

Segundo explicaron nun comunicado, nas alegacións piden que a revisión non afecte a elementos como toldos, antenas, portabicicletas ou placas solares. Lembran que hai máis de 60.000 autocaravanistas en España que xa incorporaron este tipo de elementos nos seus vehículos, "sen que se converteron nun factor de incremento de accidentes de tráfico".

O cambio na norma como está exposto suporía a obrigación de homologar estes elementos e unha retroactividad que xeraría un prexuízo a todas estas persoas, o que AGA considera "inxusto" dado que "estes elementos non xeraron ningún problema relacionado coa sinistralidade".

Así, sinalan que nos últimos meses algunhas ITVs comezaran a aplicar o borrador do regulamento, aínda en fase de redacción, xerando problemas aos autocaravanistas.

"Ante a presión de entidades como AGA ou o Club de Autocaravanas do Principado de Asturias (CAPA), o Ministerio de Industria enviou unha circular ás ITVs para que deixen de esixir a homologación incluída nunha reforma que aínda está en fase de tramitación. Iso quere dicir que ningunha ITV pode esixir, neste momento, a retirada deste tipo de elementos para superar a inspección aténdose a argumentos relacionados co novo regulamento", detallan.

As dúas asociacións xa pediron estar presentes nas distintas comisións de traballo e unha interlocución directa cos responsables do Ministerio de Industria. Prevese que a modificación final do Regulamento entre en vigor no mes de outubro deste ano.

Autocaravanas.