A balneoterapia, unha alternativa en auxe contra a dor crónica e a síndrome post-covid

Entre o 60% e o 80% da poboación presentará algún tipo de dor lumbar ao longo da súa vida, que pode chegar a ser incapacitante en moitos casos. A maior indicencia da lumbalxia atópase entre os 25 e os 45 anos, e establécese como a principal causa de limitación da actividade en persoas maiores de 45 anos. De feito, esta doenza está detrás do 15% das baixas laborais. Son datos aportados polo doutor Jorge Blanco, médico adxunto do Servizo de Reumatoloxía do Complexo Hospitalario Universitario de Santiago (CHUS), que vén de abordar a balneoterapia no tratamento das lumbalxias no ciclo 'A saúde é o que importa' da 

Cátedra de Hidroloxía Médica USC-Balnearios de Galicia.

Esta iniciativa, que cumpre a súa 4ª edición, conta coa colaboración da Fundación Araguaney e ten como obxectivo difundir entre a sociedade o valor terapéutico das augas mineromedicinais. Este mércores, 20 de abril, celebrouse a primeira sesión do ano: unha mesa redonda na que se trataron as indicacións da cura termal para o tratamento da lumbalxia, fibromialxia e síndrome post-covid da man do doutor Jorge Blanco, a catedrática de Hidroloxía Médica da Universidade da Coruña Rosa Meijide, e o director médico do balneario Caldelas de Tui Elías Festa. A charla estivo moderada polo director da Cátedra, o doutor Juan Gestal. 

 

HIDROTERAPIA TERMAL

 

Segundo o experto Jorge Blanco, a hidroterapia termal permite mitigar a dor en pacientes con lumbalxia e acelerar o seu proceso de recuperación debido ás diferentes propiedades das augas mineromedicinais, xunto á temperatura e a presión, a presenza de compostos orgánicos en disolución… Ademais, o exercicio físico na auga fai posible exercitar a musculatura debilitada en ausencia de gravidade. Así, "as diversas técnicas de hidroterapia son recomendables para reducir a dor, a rixidez e a funcionalidade lumbar, logrando unha rehabilitación máis rápida", explicou.

O especialista salientou, así mesmo, que "os medicamentos que se administran para combater as lumbalxias, como antiinflamatorios, derivados da morfina, relaxantes musculares,

paracetamol ou corticoides, non conseguen mellores resultados que a aplicación das augas mineromedicinais". Neste sentido, apuntou que "a balneoterapia se presenta como un tratamento coadxuvante eficaz e que, ademais, posúe a enorme vantaxe de que carece de efectos secundarios".

PACIENTES CON FIBROMIALXIA

A fibromialxia, pola súa banda, é unha enfermidade crónica que afecta, segundo datos da Sociedad Española de Reumatología, ao 2,4% da poboación do Estado, case na súa totalidade mulleres de entre 40 e 49 anos, aínda que os primeiros síntomas poden aparecer entre os 20 e os 40 anos. Preséntase con dor xeralizada en todo o corpo, fatiga crónica, rixidez, alteracións do sono... As súas causas descoñécense, aínda que a comunidade experta opina que podería deberse a unha distorsión da percepción da dor nestes pacientes, que fai que o organismo interprete mal certos estímulos e se perciba a dor como máis aguda.

A doutora Rosa Meijide explicou o valor terapéutico das augas mineromedicinais para pacientes con fibromialxia. "A balneoterapia permite mellorar en boa medida a calidade de vida, redúcense tanto os puntos de dor como a súa intensidade, o cansazo, o sono e mesmo o seu estado emocional, posto que a depresión é habitual nestes casos", indicou.  Nesta liña, engade que "os centros termais son instalacións sanitarias que dispoñen de especialistas médicos que aconsellan sobre as diversas opcións terapéuticas e tamén se ofrece apoio psicolóxico".

SÍNDROME POST-COVID

Doutra parte, o doutor Elías Festa explicou as principais técnicas termais que se aplican na actualidade para combater a dor. Sinalou, así, que "para o deseño dunha estratexia terapéutica en relación co tratamento da dor vía termal se debe ter en conta a súa orixe, é dicir, se é aguda, crónica e se é ou non inflamatoria. Tamén é importante a historia clínica do paciente, por se presenta patoloxías concorrentes ou excluíntes".

No caso particular as persoas con Síndrome Post-Covid, que sofren fatiga crónica, dificultade respiratoria e dor xeralizada, a pauta de tratamento son -segundo o doutor- as inhalacións, os aerosois, o baño de burbullas e a ducha circular. Festa indicou, ademais, que “"dos doentes tratados, todos sentiron unha melloría obxectiva da súa situación previa despois das tres primeiras sesións no balneario".