Máis de 700 axentes de policías e Garda Civil recibirán formación en violencia machista
As xornadas terán lugar a través da Academia Galega de Seguridade Pública.
Por E.P. | SANTIAGO DE COMPOSTELA | 10/05/2022 | Actualizada ás 13:13
A Xunta formará a máis de 700 axentes das policías locais, autonómica, nacional e da Garda Civil en materia de violencia machista para optimizar a súa actuación coas vítimas, a prevención e o seguimento destes casos. É a principal liña dun acordo asinado entre a Vicepresidencia Primeira e a Consellería de Emprego e Igualdade, no marco das medidas previstas polo Goberno galego para desenvolver o Pacto de Estado contra a Violencia de Xénero.
En concreto, segundo informa a Xunta, a través da Academia Galega de Seguridade Pública (Agasp) impartiranse as accións formativas dirixidas ao persoal dos corpos policiais que traballan na Comunidade. Tamén se desenvolverán campañas de sensibilización entre as forzas de seguridade e xornadas de interese xeral.
Estes cursos permitiranlles optimizar o seu traballo tanto nas intervencións operativas, como no ámbito da prevención e actuación coas vítimas e co funcionamento do sistema 'Vioxen' de seguimento de casos. A Agasp celebrará un curso de iniciación contra a violencia de xénero dirixido a policías locais, no cal participarán unhas 120 persoas. No caso da formación especializada, serán uns 600 axentes municipais, nacionais, autonómicos e gardas civís. Todas estas medidas estarán financiadas con preto de 16.000 euros con cargo aos fondos do Pacto de Estado contra a Violencia de Xénero que corresponden a Galicia.
