Unha limpeza descobre a lareira e o comedor do convento de Santa Clara, en Pontevedra
A Deputación e o Concello estudan as posibilidades de que o monumento se converta nunha nova sede do Museo provincial.
Por Europa Press / Redacción | PONTEVEDRA | 10/05/2022 | Actualizada ás 18:42
Os traballos de retirada de cascallos, lixo e desfeitos dos baixos do convento de Santa Clara, en Pontevedra, están a deixar á vista a distribución orixinaria destes espazos, cando eran empregados como almacéns.
A Deputación provincial de Pontevedra é a encargada de realizar esta limpeza en virtude do protocolo asinado neste ano co Concello de Pontevedra para estudar as posibilidades de que o convento se converta nunha nova sede do Museo provincial. A limpeza comezou cunha primeira selección de elementos claramente a conservar, que van desde enreixados que estaban almacenados, a alacenas, portas ou ducias de cacharros empregados na vida cotiá das monxas, entre outros moitos achados.
A continuación, unha empresa de limpeza retira nestes días, con sumo coidado, ducias de elementos de desfeito, desde vides das podas das viñas, leña ou tellas en moi mal estado de conservación. Os técnicos provinciais son os encargados de dirixir esta limpeza, e indican que elementos son susceptibles de retirar e cales se conservan atendendo ao seu diverso valor.
Está previsto que a retirada do lixo destes dous baixos finalice nesta semana, para permitir o inicio dos traballos arqueolóxicos e históricos que a Deputación tamén contratou e que permitirán coñecer a situación do edificio e ver as posibilidades de incorporalo ao Museo provincial.
ACHADOS
Este rebo serviu para descubrir a pegada da historia do convento. Parece claro que a cociña orixinaria se atopaba nesta zona, xa que alí está a lareira, que recuperou a súa forma orixinaria despois de retirar a gran cantidade de lixo que acumulaba.
Tamén parece claro que a continuación se achaba o Refectorio (comedor da comunidade relixiosa) hai uns 200 anos, porque así tamén o relataron as últimas ocupantes do cenobio ao alcalde Miguel Anxo Fernández Lores.
Precisamente neste lugar, nese anterior Refectorio, os últimos achados mostran que foi transformado en cuadra, xa que se atoparon recipientes para alimentar a animais, aparentemente crías. Nesta nave tamén se acharon policromías.
