Familias monoparentais denuncian "hipocrisía" da Xunta e "atrasos" e "opacidade" nas medidas prometidas

A delegación galega da Asociación Nais Solteiras por Elección denunciou "hipocrisía", "atrasos" e "opacidade" nas medidas prometidas no seu favor pola Xunta de Galicia, entre elas a creación do Rexistro de Familias Monoparentais de Galicia. Segundo explican, demandan do Goberno galego unha "definición" do modelo de familia, a posta en marcha do rexistro e medidas que "favorezan a conciliación e a crianza".

"A Consellería manifesta que as familias monoparentais somos de especial consideración na Lei 3/2011, do 30 de xuño, de apoio á familia e a convivencia de Galicia e en moitas das súas comunicacións públicas, pero seguimos á espera de accións e normativas que así o apoien", denuncia a asociación.

Lamentan tamén que a información non sexa transparente e que "se faga pública primeiro nun artigo de xornal e despois a través de canles oficiais da Consellería".

Fan referencia, explican, a un artigo do 19 de abril no que se anunciaba que Galicia triplicara nun ano a expedición do carné de familias monoparentais, como consecuencia da eliminación "dun dos principais requisitos: non percibir ningún ingreso por parte do proxenitor non convivente, para ser considerada familia monoparental" e que dita acreditación permitía acceder a vantaxes tales como "beneficios fiscais".

Indican que esta información é "falsa e inexacta", xa que non gozan de máis beneficios que a puntuación para entrar en escolas infantís e descontos nos campamentos organizados pola Xunta, ou do 20% de bonificación nas escolas infantís, "beneficio que desaparece ao converterse nun servizo gratuíto".

"Gustaríanos aclarar que, máis aló da anteriormente indicada, gozamos das mesmas que calquera familia galega independentemente da súa condición ou non de monoparentalidade", insisten.

Sinalan ademais que, tras recibir a noticia con "sorpresa", puxéronse en contacto por correo electrónico coa Consellería de Política Social e a Dirección Xeral de Familia, Infancia e Dinamización Demográfica, "solicitando as fontes do artigo publicado".

"Remitíusenos á modificación normativa producida coa Disposición Final Terceira da Lei 5/2021, de 2 de febreiro e aos datos estatísticos da Memoria da Consellería de Política Social de 2021, que aínda non son públicos", destacan.

REXISTRO DE FAMILIAS MONOPARENTAIS

Respecto ao atraso na publicación do borrador do Rexistro de Familias Monoparentais de Galicia, a Dirección Xeral "escudouse" en estar a esperar a aprobación da Lei estatal de Diversidade Familiar para "blindar a seguridade xurídica das familias en Galicia" e "evitar conflitos" entre a normativa estatal e autonómica.

Apuntan, con todo, que estes "hipotéticos conflitos" non supuxeron un impedimento para modificar os criterios de acceso ao certificado de familia monoparental.

Sobre este punto, a asociación fai referencia á Lei de impulso demográfico, Lei 5/2021, que habilita un prazo de seis meses para a elaboración do Rexistro de Familias Monoparentais, "prazo que finalizou, sen noticias, en outubro do 2021".

"Posteriormente, a conselleira de Política Social anunciou no Parlamento que a Xunta sacaría a consulta pública en febreiro de 2022 o decreto que regularía e acreditaría a condición das familias monoparentais, prazo que tampouco se cumpriu", remarcan.

A asociación incide en que presentaron diversas propostas desde 2017, polo que lamentan que a Xunta "siga ignorando" este modelo de familia e aplique unha forma de proceder "informal, arbitraria e cunha falta total de transparencia".