A Xunta demorará a publicación dos datos de mortes en residencias privadas de Galicia
O TSXG obriga á publicación destas cifras logo de desestimar os recursos de centros privados. A Consellería de Política Social recoñece contar cos datos desagregados, pero agardará a que a sentenza sexa firme para sacalos á luz.
- O TSXG obriga ás residencias privadas a informar sobre contaxios e mortes por Covid
- A Xunta defende a súa xestión das residencias no día en que se anuncian outras catro mortes
Por Europa Press / Redacción | SANTIAGO DE COMPOSTELA | 25/05/2022 | Actualizada ás 16:45
O presidente da Xunta, Alfonso Rueda, ratificou que o Executivo autonómico "cumprirá nos termos nos que veña" a sentenza do Tribunal Superior de Xustiza de Galicia (TSXG) que avala que os xornalistas teñen dereito a acceder á información do número de contaxios e falecementos por covid-19 ou síntomas compatibles ocorridos en cada residencia de maiores privada de Galicia entre o 1 de marzo e o 30 de abril de 2020.
En concreto, este fallo, emitido o luns pola Sección Terceira da Sala do Contencioso-administrativo e contra o que aínda cabe recurso de casación, confirma unha resolución da Consellería de Política Social pola que se concedeu o acceso a eses datos e que foi recorrida polas residencias, que se opuñan a facilitar a dita información.
A xuízo dos maxistrados, neste caso debe primar o dereito ao acceso á información pública que consagra a Constitución no seu artigo 105, así como as leis estatal e galega de transparencia. "O interese público da información solicitada debe prevalecer sobre o interese comercial das empresas. A afectación de tales intereses --como alegan os centros-- é puramente especulativa, sen fundamento real", di a sentenza
Preguntado respecto diso na rolda de prensa posterior ao Consello, Rueda afirmou que non coñece a sentenza directamente, pero que ouviu " falar dela". "Estúdana os servizos xurídicos e cumprirémola nos termos nos que veña, como non pode ser doutra maneira", apostilou.
A Consellería de Política Social e Xuventude, consultada por Europa Press, asegurou na pasada xornada que celebra esta decisión do TSXG porque lle dá a razón fronte ao recurso presentado polas empresas. Con todo, o departamento que dirixe Fabiola García aínda non ofrecerá os datos desagregados por centros privados --que si ofreceu con anterioridade--, á espera de que a sentenza sexa firme, xa que hai un prazo de 30 días para recorrer en casación.
RESIDENCIA DE PAZOS DE BORBÉN
Por outra banda, sobre as irregularidades denunciadas na residencia de Pazos de Borbén e a situación do expediente, o presidente defendeu que este "segue o seu curso" tras varias visitas de inspección nas que se constatou que "a maioría de deficiencias" ligadas con cuestións de "organización" foron corrixidas.
Rueda insistiu en que, sen saber se se corresponden coa realidade ou non, as imaxes que se difundiron vinculadas co centro "non" lle gustaron, pero reiterou que os inspectores autonómicos, nunha visita que acaba de realizarse, puideron constatar que "moitas deficiencias, a maioría, foron corrixidas", mentres que "o resto están en avaliación".
