O catedrático galego Alberto Ruano dirixe o proxecto que estudará os efectos do volcán da Palma nos habitantes da illa

O catedrático de Medicina Preventiva e Saúde Pública da USC, Alberto Ruano, será o científico encargado de dirixir o proxecto 'Ashes' sobre os efectos na saúde humana da erupción do volcán Cumbre Vieja na Palma (Canarias). A análise centrarase no impacto que este suceso terá en 2.000 persoas da illa durante o próximos cinco anos.

O proxecto 'Ashes', impulsado pola Sociedad Española de Neumología y Cirurgía Torácica (Separ), requirirá a realización de tres estudos para determinar o impacto sobre a poboación adulta, a infantil e sobre pacientes respiratorios.

Para pór en funcionamento o estudo, constituirase un grupo de expertos interdisciplinario con experiencia previa en distintas facetas de enfermidades respiratorias. Serán 20 profesionais especialistas nestas patoloxías, ademais de epidemiólogos.

Doutra banda, será investigadores principais do proxecto a pneumóloga pediátrica do Hospital Universitario de Canarias-Tenerife, Valll Velasco, e o enfermeiro especialista en patoloxía respiratoria do Hospital Nuestra Señora de Candelaria, David Díaz Pérez.

'Ashes' pretende incluír máis de 2.000 participantes no estudo, que durará cinco anos. Isto implicará a realización dun cuestionario a todas as persoas que integren o estudo para determinar marcadores de exposición aos produtos da erupción volcánica.

Doutra banda, este estudo quere formar catro grupos de investigación diferenciados: persoas moi expostas para o efecto da erupción; poboación que reside na zona máis próxima á erupción; poboación pediátrica máis próxima, e enfermos de patoloxías respiratorias.

Con este deseño, os investigadores consideran que o estudo "achegará un coñecemento científico moi valioso, xerando a mellor evidencia científica ata a data, sobre o efecto das erupcións na saúde humana e sobre as medidas que adoptar".