Un equipo do Centro Oceanográfico de Vigo desenvolve un método para identificar con precisión especies de raias e quimeras

O grupo de investigación AquaCOV do Centro Oceanográfico de Vigo, do Instituto Español de Oceanografía (IEO), desenvolveu unha metodoloxía para identificar con precisión as diferentes especies de raias e quimeras combinando ferramentas xenéticas e xenómicas. Este traballo, centrado en áreas de grande importancia pesqueira como os Grandes Bancos de Terranova e Flemish Cap, o banco de Gran Sol e o banco de Porcupine, permite o establecemento dos límites entre as poboacións, evitando así identificacións erróneas e especies mixtas, algo fundamental para a xestión sustentable das pesqueiras, segundo informa.

"Unha particularidade das grandes raias é o seu conservadurismo morfolóxico entre especies e a alta variabilidade morfolóxica e morfométrica que presentan durante o seu crecemento, á súa vez, as quimeras tamén presentan unha morfoloxía semellante entre especies pertencentes ao mesmo xénero", apunta Nair Vilas Arrondo, investigadora do Centro Oceanográfico de Vigo e autora da tese doutoral que recolle estes traballos. "Estas peculiaridades de raias e quimeras causan que a súa identificación sexa difícil, o que provoca identificacións erróneas. Ao non poder identificarse correctamente as especies, as capturas totais e os descartes declarados polas embarcacións que faenan nestas áreas non se axustan á realidade", explica a científica.

Para a identificación de ambos os grupos de especies levaron a cabo análises de ADN e análises morfométricas para desenvolver un modelo de rede neuronal quen de asignar a especie a cada morfotipo cun número axeitado de exemplares. No caso das quimeras, ademais, complementouse a taxonomía molecular coa ensamblaxe do xenoma mitocondrial, conseguindo así aumentar a robustez dos resultados.

Lonxa | Fonte: Carlos Castro - Arquivo