Rede Acampa converte A Coruña nun "espazo para a defensa dos dereitos humanos"
Encheu os xardíns de Méndez Núñez no VI Encontro Acampa pola Paz e o Dereito a Refuxio.
Por E.P. | SANTIAGO DE COMPOSTELA | 13/06/2022 | Actualizada ás 12:10
A Rede Acampa agradeceu o "cheo" na carpa central do VI Encontro Acampa pola Paz e o Dereito a Refuxio celebrado desde o xoves pasado ata o sábado nos xardíns de Méndez Núñez, na Coruña.
A cidade herculina acolleu durante tres días diferentes activistas e artistas que, a través de coloquios, exposicións, visitas guiadas e proxeccións, presentaron a súa perspectiva sobre "a pandemia da fame". Así, destacou a organización nun comunicado, A Coruña converteuse nun espazo para "a defensa dos Dereitos Humanos e as persoas vulnerables que padecen Fame".
Pese ao éxito de afluencia, a organización denunciou "vandalismo" no Campo de Interpretación da fame na noite do xoves. Aseguran que un grupo de persoas que estaba de botellón rompeu algunhas das figuras e roubaron pezas e material. En todo caso, Rede Acampa destacou que "a provocación de catro preadolescentes na caseta dunha das organizacións integrantes da Rede ao berro de 'Somos de VOX' desluciron en nada" o desenvolvemento do VI Encontro Internacional Acampa pola Paz.
"É verdade que como sociedade deben preocuparnos estes incidentes porque reflicten de maneira preocupante o que estamos a facer mal no campo da educación", lamentou o coordinador do Movemento Acampa, Xosé Abad. A pesar disto, consideran que foi "unha mancha diminuta" en comparación coa resposta da cidadanía coruñesa cara á súa "proposta reflexiva", que encheron a carpa central para participar nas actividades propostas e que, engade, lles fai sentir "indiscutiblemente orgullosos e seguros de que o traballo de Rede Acampa ten un público fiel que quere estar informado, con conciencia crítica".
Ademais, a organización subliñou tamén a visita de varios colexios e institutos da Coruña e a súa contorna ao Campo de Interpretación da fame, un espazo no que puideron escoitar as explicacións de Marga González, de Amnistía Internacional, sobre a realidade da fame, as súas causas e consecuencias para 811 millóns de persoas no mundo.
"ODIO OU CONVIVENCIA"
Por outra banda, as máis de 80 organizacións que integran Rede Acampa, reuníronse no marco deste encontro para elixir o tema sobre o que versará a proposta da sétima edición deste evento que, "por goleada", será "Odio ou Convivencia".
Neste sentido, Rede Acampa xustificou a elección debido ao "crecemento do odio a nivel global, a diminución da tolerancia social ao diferente, nun momento en que os tránsitos migratorios se multiplicarán e millóns de persoas camiñarán á procura de refuxio, debería estar na primeira liña das preocupacións de sociedades, gobernos e estados".
Por estes motivos, Xosé Abad, argumentou que "é máis que oportuno reflexionar sobre esta dicotomía" --'Odio ou Convivencia'-- e "ter claro de que lado hai que estar e estalo dunha forma militante". Por último, convidou a todas as persoas a visitar as exposicións fotográficas de #FameeRefuxio con imaxes de Ricard García Vilanova, Juan Carlos Tomasi, Silvia Landi, Lys Arango, Pablo Basto, Javier Tenente ou Rodrigo Zaim, que permanecerán expostas ata o 7 de xullo.
