Miñones ve positivo que as familias do Pitanxo se reúnan coas autoridades de Canadá
Reitera o seu apoio e asegura que o obxectivo a gora é dar continuidade ás investigacións.
Por E.P. | VIGO | 16/06/2022 | Actualizada ás 14:02
O delegado do Goberno en Galicia, José Miñones, reiterou o seu apoio ás familias dos 21 falecidos no naufraxio do pesqueiro galego 'Villa de Pitanxo', que se afundiu o pasado 15 de febreiro a 450 quilómetros da costa de Terranova (Canadá).
En declaracións aos medios de comunicación, Miñones puxo en valor que se vaia celebrar unha reunión entre familiares e as autoridades de Salvamento Marítimo de Canadá, a pesar de que as familias rexeitaron a mediación do Goberno e anunciaron que serán elas as que tramiten este encontro a través da Embaixada do Canadá en España.
"Creo que o máis positivo de todo é que esa xuntanza se vaia realizar. Era o obxectivo que nos expuñan as familias, o ter este contacto cos responsables de Salvamento Marítimo de Canadá", subliñou Miñones, quen lembrou que se lles solicitou facer ese trámite á Delegación do Goberno, pero finalmente foi rexeitado polas familias. "Se eles agora queren facelo a través da Embaixada canadense en Madrid, o importante é que se faga. Iso é o único que nos preocupa", subliñou.
Neste sentido, agradeceu á Embaixada española e á canadense que tramitasen esta reunión, que levará a cabo por videoconferencia, e destacou que o obxectivo agora é dar continuidade ás investigacións, tanto a da Comisión Permanente de Investigación de Accedentes e Incidentes Marítimos como á do xulgado, para así "esclarecer o sucedido". Tamén indicou que o Executivo vai estar á beira dos responsables da investigación no momento que sexa necesario e no que requiran, e agora seguirán "á beira das familias".
Todo iso despois de que as familias dos falecidos rexeitasen a mediación do Executivo e anunciasen que pactarán unha reunión coas autoridades canadenses a través da Embaixada de dito país en España, que previsiblemente levará a cabo na primeira semana do mes de xullo. Así, a portavoz dos familiares, María José de Pazo, criticou a "falta de comunicación e a falta de respecto" que, ao seu xuízo, ten a Delegación do Goberno con elas, por establecer unha data para o encontro de forma "unilateral".
O 'Villa de Pitanxo' afundiu o pasado 15 de febreiro a 450 quilómetros da costa de Terranova (Canadá), polo que foron os servizos de emerxencias do país norteamericano os que actuaron nun primeiro momento e levaron a cabo os labores de rescate.
