Caras novas na nova temporada de informativos da TVG
Sevi Martínez presentará 'A Revista', Ana Pérez o 'Galicia Noticias' e Antón Galocha substitúe a Carlos Luis Rodríguez como conductor de “Foro Aberto”.
Por Galicia Confidencial | Compostela | 06/09/2014 | Actualizada ás 11:30
A Televisión de Galicia estrea o luns a nova temporada de informativos. Faino con algúns cambios na presentación de programas, como a volta de Ana Pérez ou Sevi Martínez e a chegada de Antón Galocha, o ex director do Diario de Pontevedra.
Entre as novidades, a directora do departamento, Pilar Bermúndez, salienta, ademais da incorporación de caras novas, un maior apoio gráfico e un programa novo, 'Contraportada'.
A información esperta co 'Bos días'. Marta Darriba e Francisco López presentan este espazo coa actualidade da xornada e con tempo para o debate. Contra o mediodía, Sevi Martínez presenta 'A Revista'. A información continúa no 'Galicia Noticias', con Ana Pérez, e no 'Telexornal mediodía', con Marga Pazos. No serán, Beatriz Moyano presenta o 'Galicia Noticias' e Carlos Amado un telexornal con máis tempo para a reflexión.
O telexornal de fin de semana estará conducido por Irene Lourido. Antes, 'A Revista', con María Solar. De luns a xoves regresa un 'Foro Aberto' renovado, un espazo para o debate que presentará Antón Galocha. Substitúe a Carlos Luis Rodríguez.
Os deportes seguirán tendo esta tempada un papel destacado nos informativos e tamén cos programas En xogo e A Liga das Cidades. O equipo de Deportes da TVG non só estará co Celta e co Deportivo na liga dás Estrelas e co Lugo na categoría de prata, senón tamén co fútbol de Segunda B e de Terceira.
Ademais, o baloncesto, co papel destacado do Obradoiro, completará unha tempada que a cadea espera que sexa "histórica". Os programas non diarios 'Parlamento', 'Vivir ou Mar', 'O Agro' e 'Reportaxes Locais' completan a oferta de informativos da TVG.
