O PSOE critica as "declaracións oscilantes" da Xunta sobre o inicio de curso e o PP di que houbo "normalidade"
O pleno desta semana tratará a cuestión educativa entre as acusacións de recortes e as críticas á Lomloe.
Por E.P. | SANTIAGO DE COMPOSTELA | 12/09/2022 | Actualizada ás 14:02
O portavoz parlamentario do PSdeG, Luís Álvarez, criticou este luns as "declaracións oscilantes" do conselleiro de Educación, Román Rodríguez, a raíz do inicio do curso escolar, un momento do que o portavoz popular, Pedro Puy, destacou a "normalidade".
Nunha rolda de prensa convocada para tratar asuntos de actualidade, Luís Álvarez lembrou que os socialistas realizarán, no pleno desta semana, unha pregunta ao presidente para valorar o inicio do curso escolar. A cuestión formúlase tras as "declaracións oscilantes do propio conselleiro" que, dixo Álvarez, "sementou dúbidas sobre o inicio do curso escolar hai dúas semanas" e "pasou a falar a semana pasada dun inicio de curso presidido por unha gran normalidade".
"Se o mesmo conselleiro fala dun inicio de curso caótico e, poucos días despois, di que houbo gran normalidade, cabe concluír que, para o conselleiro, o caos é unha gran normalidade", dixo o portavoz dos socialistas.
NORMALIDADE
Pola súa banda, o portavoz parlamentario do PPdeG, Pedro Puy, referiuse nunha rolda de prensa á comparecencia do conselleiro de Educación no Pleno para falar dun inicio de curso, na súa opinión, marcado pola normalidade.
"Despois de todo o que escoitamos da catástrofe que ía ser o inicio do curso académico, certamente empezou con normalidade, e as únicas disfuncións básicas teñen que ver coa aplicación da nova lei de educación", dixo Pedro Puy, que implica "certo atraso" cos libros de texto.
