Ecoloxistas piden controis de alcol e veto a menores nas batidas de caza

A fundación ecoloxista Franz Weber expuxo este luns un "compendio de cambios lexislativos" para previr accidentes de caza, como o ocorrido este domingo en Viana do Bolo, reclamando que se prohiba a participación de menores de idade ou que se estableza un tope de alcol cero durante as batidas.

A entidade lembrou que o número de vítimas mortais desta actividade na última década aproxímase á vintena, unha situación ante a que a normativa "non axuda a previr contextos de risco".

A fundación sinala que a lei de caza de 2013 "non establece límites ao consumo de bebidas alcohólicas nin substancias estupefacientes e tampouco dota ao corpo de Axentes Ambientais dos medios técnicos necesarios para realizar hipotéticos controis".

Tampouco a normativa establece medidas de seguridade para as persoas menores de idade. Aínda que fixa en 16 anos a idade para poder dispor dunha licenza de caza e portar armas, "non existe molestia algunha á súa participación como espectadores ou acompañantes, polo que poden participar das cazarías con calquera idade".