O partido de Pachi Vázquez, Espazo Común, ofrece "apoio legal" ás traballadoras do asilo do Carballiño

O partido Espazo Común, liderado polo exsecretario xeral dos socialistas galegos Pachi Vázquez, ofreceu este luns "apoio legal" ás traballadoras do asilo do Carballiño que recibiron unha multa por manifestarse no consistorio do municipio ourensán o pasado mes de agosto.

O sucedido remóntase ao 5 de agosto, cando varias traballadoras do centro accederon ao salón de plenos do concello carballiñés para despregar unha pancarta desde o balcón coa lema 'Non ao acoso e os despedimentos no asilo'.

As traballadoras foron convidadas a retirarse do centro, xa que era unha manifestación que non contaba cos permisos pertinentes, pero negáronse, motivo polo que foron identificadas pola Policía Local e recibiron agora unha multa que ascende a 601 euros.

Desde Espazo Común consideran que se trata de "unha persecución por parte do alcalde", Francisco Fumega, cara a "aqueles que non lles dan palmadas nas costas nin rin as bromas", e aseguran que roza "o comportamento fascista".

Sinala a agrupación que as traballadoras só acudiron para pór de relevo a situación que teñen que padecer no seu ámbito laboral, "por mor da nova dirección imposta polo Padroado da Fundación Irmáns Prieto", que preside o bispo ourensán, Leonardo Lemos.

Ademais, lembran que esta manifestación non é a primeira que realizan as traballadoras, que tiveron actos reivindicativos semellantes na Catedral de Ourense, e mesmo no Bispado, sen ningún tipo de problema. Por iso, inciden en que "Fumega non tolera que se lle leve a contraria" e lamentan que "o que parecía unha rabecha" sexa unha sanción de 600 euros para "unhas veciñas que só buscan darlle visibilidade a un problema que xa tiña que estar resolto".

Por todos estes motivos, o que fose alcalde do Carballiño e secretario xeral do Partido Socialista de Galicia, actualmente edil de Espazo Común, Pachi Vázquez, ofreceu a estas mulleres "todo o apoio que necesiten, tanto legal como de calquera tipo", para a "redacción dun prego de alegacións", así como para levar á corporación "calquera iniciativa que queiran tomar".

As traballadoras demandan o cesamento da "política represiva e do acoso laboral" que din que a nova xerencia do centro está a levar a cabo sobre as empregadas máis antigas do asilo. Ademais, piden tamén a readmisión de compañeiras despedidas.

Desde a CIG, sindicato convocante dos actos reivindicativos, denunciaban este verán que a nova xerencia do asilo "leva a cabo unha política implacable de acoso e represalia", chegando mesmo a despedir a varias das traballadoras "por reclamar os seus dereitos"; e acusaban a "a dirección de menosprecios e coaccións ás empregadas".

Pachi Vázquez, fundador de Espazo Común, no centro | Fonte: Europa Press.