A Xunta presenta o proxecto de ampliación do CHUS, que suporá aumentar nun 30% a súa superficie
Licítase por 72,8 millóns
Por E.P. | SANTIAGO DE COMPOSTELA | 11/10/2022 | Actualizada ás 15:44
A Xunta presentou este martes aos profesionais sanitarios o proxecto de ampliación do Complexo Hospitalario Universitario de Santiago, que finalmente se licitará por 72,8 millóns, xa que, segundo explicou o conselleiro de Sanidade, Julio García Comesaña, axustáronse ás características e ao momento de aumento nos últimos tempos do prezo dos materiais de construción.
Nun acto celebrado no centro hospitalario, no que ademais do titular de Sanidade participou a conselleira de Infraestruturas e Mobilidade, Ethel Vázquez, o arquitecto da obra, Joaquín López Fando, explicou ao persoal sanitario que acudiu a esta presentación o máis destacado desta ampliación, que suporá un aumento do 30% da súa superficie actual de 97.000 metros.
Así, con este proxecto incrementaranse dous dos seus edificios actuais. O edificio A, ampliarase cara ao oeste para contar cunha nova zona de urxencias pediátricas. Ademais, as obras neste apartado do hospital santiagués contemplan a reforma das urxencias de adultos, dos laboratorios de inmunología e microbiología, así como dos mortuorios. Tamén se habilitará un novo bloque cirúrxico con sete quirófanos e unha área de espertar.
Así mesmo, o CHUS incrementará as súas instalacións na área de endoscopias, especialmente para as dixestivas. Outra das actuacións destacadas é o traslado do heliporto, que se situará na cuberta do edificio A.
Por outra banda, as obras no edificio C contemplan a ampliación cara ao este do cinco plantas actuais, nas que se situarán as áreas de cirurxía plástica e maxilofacial, a unidade de mama e un hospital de día con capacidade para 50 postos, entre outras.
Segundo estimou o arquitecto, o prazo de execución destas obras será duns 44 meses, realizaranse de forma simultánea e o Goberno galego prevé que comecen a principios da primavera de 2023.
