O BNG presenta enmendas aos PGE pedindo mellorar a conectividade ferroviaria da Montaña e Valdeorras
"Consideramos insuficiente esta partida e, con estas emendas, reclamaremos xustiza para o noso país e superar o déficit histórico que sofre en materias como a mobilidade, sobre todo en infraestruturas", resaltou o deputado do Bloque no Congreso, Néstro Rego.
Por E.P. | SANTIAGO DE COMPOSTELA | 29/10/2022 | Actualizada ás 18:08
O BNG incluíu entre as súas emendas aos Orzamentos Xerais do Estado (PGE) unha batería de peticións centradas nas melloras da conectividade por ferrocarril nas comarcas da Montaña e Valdeorras.
Despois de facilitar co seu voto a tramitación do PGE no seu primeiro debate parlamentario esta semana, a formación frontista incide nun comunicado emitido este sábado que o Goberno debe aumentar a dotación economómica que reserva para investimentos en Galicia.
"Consideramos insuficiente esta partida e, con estas emendas, reclamaremos xustiza para o noso país e superar o déficit histórico que sofre en materias como a mobilidade, sobre todo en infraestruturas", resaltou o deputado do Bloque no Congreso, Néstro Rego.
Entre as emendas rexistradas, o BNG destaca este sábado as que incumben ás comarcas da Montaña e Valdeorras, para as que pide compromisos en materia de infraestruturas, especialmente as asociadas á conectividade por ferrocarril e estrada.
Así, en canto á comarca luguesa, Rego demanda melloras na liña ferroviaria entre Santigo e Lugo e actuacións de mellora da seguridade viaria nas estradas N-547 e N-634.
"Entendemos que o Goberno non ten ningunha escusa para construír a liña que permitiría conectar Lugo con Santiago de Compostela. Coa construción de 30 quilómetros, enlazando as paradas de Curtis e Ordes, poderíamos vertebrar o noso territorio", incidiu Rego.
Para a comarca de Valdeorras, o BNG demanda a reapertura das estacións ferroviarias da Rúa e O Barco, así como a potenciación do Corredor Noroeste e o saneamento dos ríos Casoio e Sil.
Segundo o deputado nas Cortes, a comarca ourensá é un exemplo da "discriminación" que cometen os PGE con Galicia porque "deixa sen resolver problemas que se arrastran desde hai anos" e que no caso de Valdeorras demóstrase coa ausencia nas contas de partidas para remodelar a ligazón que conecta A Rúa coa N-120, unha obra recollida "durante varios anos consecutivos" nos orzamentos do Estado.
A rehabilitación desa estrada na fronteira entre Castela e León e Galicia ou a construción da autovía A-76 entre Ponferrada e Ourense son outras das demandas que o BNG recolle nas súas emendas ás contas.
ANA MIRANDA, EN BRASIL
Por outra banda, o BNG tamén comunicou este sábado que a súa eurodeputada Ana Miranda está esta fin de semana no Brasil como parte dun grupo de europarlamentarios "preocupados" pola situación do país, no que se vota este fin de semana a segunda volta das eleccións presidenciais nas que os brasileiros escollerán entre Jair Bolsonaro e Lula Dá Silva.
"Deputados e deputadas do Parlamento europeo de tres grupos políticos diferentes quixemos estar presentes na segunda volta das eleccións presidenciais do Brasil ante a preocupación pola violencia política e os ataques sistemáticos á democracia brasileira", manifestou Ana Miranda, que denunciou que o actual presidente brasileiro e candidato á reelección, Jair Bolsonaro, non aceptase realizar unha misión de observación electoral da UE.
Así as cousas, a europarlamentaria advirte do "aumento da violencia, as ameazas e a intimidación" ao longo da xornada electoral e manifestou, ademais do seu apoio a Lula, a súa solidariedade con colectivos "atacados" como o LGTBI.
