A Xunta convoca unha oferta de emprego "extraordinaria" de acceso libre para Seaga, Xesgalicia e outros entes
Di que o recolle na lei de orzamentos da Xunta para "reforzar", entre outras cuestións, a xestión de fondos europeos.
Por Europa Press / Redacción | SANTIAGO DE COMPOSTELA | 17/11/2022 | Actualizada ás 13:53
O Goberno galego impulsará unha oferta de emprego público (OEP) extraordinaria e "complementaria" á ordinaria de 2022 que contempla un total de 84 prazas de acceso libre.
O groso destas prazas --un total de 58-- resérvanse para a Empresa Pública de Servizos Agrarios (Seaga), nove para Xesgalicia, oito para Protos de Galicia, seis para Galaria e tres para a Sociedade Pública de Investimentos (SPI).
Así o trasladou o presidente da Xunta, Alfonso Rueda, na comparecencia ante os medios posterior á reunión semanal do seu Executivo. Nela, explicou que a lei de orzamentos recolle a posibilidade excepcional de ofertar prazas para cubrir as necesidades en novos servizos que se poñan en marcha.
Así, as novas prazas desta oferta de emprego irán ligadas a novos servizos e tamén para "reforzar" a xestión de fondos europeos. É, recalcou o xefe do Executivo, unha OEP "extraordinaria, independente e complementaria" á ordinaria que se aprobará antes de fin de ano e cuxas prazas nas diferentes áreas xa se avanzaron.
