Impulsa Galicia prevé máis de 5.000 empregos con catro proxectos de máis de mil millóns de investimento

Xerar biogás e fertilizantes a partir de excedentes de xurros, transformar madeira certificada en fibras téxtiles sustentables, producir hidróxeno verde para descarbonizar a economía ou instalar un xigawatt de nova potencia enerxética renovable. Son os catro proxectos tractores da sociedade público-privada Impulsa Galicia e que suporían máis de mil millóns de investimento e a creación de máis de 5.000 postos de traballo entre directos e indirectos.

En Impulsa Galicia traballan desde hai ano e medio Xunta (40%), a entidade financeira Abanca (38%), a enerxética Reganosa (12%) e a empresa pública Sogama (10%), socios fundadores que achegaron un capital de cinco millóns de euros para botar a andar un ente que "desenvolve boas ideas para convertelas en grandes proxectos".

Un dos proxectos máis avanzados nunha comunidade de extensos bosques e onde está asentado o xigante Inditex é unha fábrica de fibras téxtiles sustentables a partir de madeira e reciclaxe téxtil que aspira a producir 200.000 toneladas anuais. Altri, grupo portugués fabricante de celulosa, foi o líder industrial elixido para materializar que en Galicia se fabrique lyocell, unha fibra que se comercializará para fiado, corte e confección.

A previsión é un desembolso global estimado de 800 millóns e xerar 2.500 postos de traballo directos e indirectos para colmar a aspiración de pechar o ciclo produtivo do forestal en Galicia. Altri elixiu o concello lucense de Palas de Rei para a localización da fábrica e á espera de poder acceder a fondos da Unión Europea que lle toca repartir ao Goberno español, sitúa a "toma de decisións final" no primeiro semestre do próximo ano.

O proxecto de Impulsa Galicia que polo momento si foi favorecido cos PERTE é o de xeración de hidróxeno verde que ten como socios industriais a Reganosa e EDP Renovables no municipio coruñés das Pontes, onde se prevé un investimento inicial de 130 millóns de euros que, sumando as diferentes conexións necesarias podería chegar aos 155 millóns e contar coas primeiras fases en operación en 2025.

Este proxecto, que prevé unha planta de 100 megawatts de potencia, conta con amparo de dúas liñas do PERTE: a de pioneiros e a de axudas á cadea de valor e o Goberno xa aprobou que en principio perciba 24 millóns de euros. Segundo Impulsa Galicia, xerará 250 empregos directos e 150 indirectos.

Ademais dun cambio na forma na que se están repartindo os fondos europeos ata o momento, Impulsa Galicia tamén reclama ao Goberno central primas ao biogás porque outro dos seus proxectos de economía circular é o da transformación a gran escala de excedentes de xurros. Liderado polas enerxéticas Reganosa, Repsol e Naturgy, consiste en despregar progresivamente polo territorio unha rede de plantas que valoricen os excedentes de xurros das 30.000 explotacións gandeiras galegas.

Os seus cálculos son que a primeira planta de dixestión anaerobia que produza gas renovable se localice en Meirama, no municipio coruñés de Cerceda, entre finais de 2023 e principios de 2024, pero subliña que tamén levará "todas as plantas que sexan necesarias para o tratamento do xurro na totalidade do territorio", buscando "a proximidade ás zonas con máis carga gandeira".

Cun investimento aproximado de 146 millóns de euros, na primeira fase produciríanse uns 300 xigawatts hora de biometano que se inxectarían á rede de gas natural. Os impulsores da idea destacan que este gas renovable utilizaríase para descarbonizar distintos sectores e que se podería empregar nos procesos da refinaría de Repsol na Coruña.

Os seus promotores calculan que despregado o proxecto, o biometano producido equivalería a un 7% do gas natural de importación que agora se demanda en Galicia, evitaríase a emisión á atmosfera dunhas 500.000 toneladas anuais de CO2 e crearíanse máis de 600 postos de traballo directos e 1.900 indirectos, considerando tanto a explotación das plantas como a loxística de transporte.

A entidade de colaboración público-privada busca tamén avanzar na dixitalización de Galicia e para iso propúxose crear a súa propia 'nube' cun gran centro de datos, que precisamente, nutriríase de enerxía renovable producida en Galicia.

O director xeral de Mercado de Capitais, Xestión e Distribución Institucional de Abanca e membro do comité executivo de Impulsa Galicia, Juan Luís Vargas-Zúñiga, destaca que este 'data center carbon positive' (neutro en emisións de CO2) beneficiaría "a todos os sectores". Argumenta que a xestión de datos revoluciona a forma de achegarse aos clientes "e iso está en todas as capas da sociedade e do mundo empresarial".

Agrega que Galicia vai así a ofrecer máis oportunidades laborais para universitarios de primeiro nivel que se están formando e terá a capacidade de "atraer persoas de terceiros sitios. Así mesmo, unha 'nube' galega permitiría reducir a dependencia dos grandes provedores de servizos de datos a nivel mundial.