O Congreso aproba una iniciativa do PP para pedir ao Goberno que conxele as peaxes da AP-9 e AP-53
Saíu adiante coa abstención do PSOE, Unidas Podemos e o BNG.
Por E.P. | SANTIAGO DE COMPOSTELA | 14/12/2022 | Actualizada ás 18:19
A Comisión de Transportes, Mobilidade e Axenda Urbana do Congreso dos Deputados aprobou este mércores unha proposición non de lei impulsada polo Grupo Popular para pedir ao Goberno central que conxele as peaxes das autoestradas galegas AP-9 e AP-53.
Esta iniciativa, presentada polos 'populares' galegos, foi aprobada a pesar da abstención do PSOE, Unidas Podemos e o Grupo Plural, do cal forma parte o BNG.
Foi o deputado Celso Delgado (PP) o encargado de defender a proposta, argumentando que o Executivo central ten "os medios e o deber" de limitar a subida das peaxes nas autoestradas de titularidade estatal para "evitar que os galegos teñan que asumir o próximo 1 de xaneiro unha subida histórica no peor momento".
"É posible limitar as subidas das peaxes tanto chegando a acordos coas concesionarias como asumindo as arcas públicas este incremento das tarifas, ou actuando desde o campo impositivo reducindo a carga fiscal das concesionarias e mesmo rebaixando o IVE das peaxes", reivindicou Delgado.
Ao seu xuízo, o Goberno "ten marxe orzamentaria" para abordar os custos estimados que suporía esta medida, que roldarían os 15 millóns de euros e lamentou que "ante a escalada de prezos e o evidente impacto do IPC non se previu ningunha medida concreta nos Orzamentos Xerais do Estado de 2023 para paliar o impacto da subida das peaxes no peto das familias e na competitividade das empresas".
