O motorista lucense Eduardo Iglesias parte para o Rally Dakar co obxectivo de chegar á meta
Por Europa Press / Redacción | LUGO | 15/12/2022 | Actualizada ás 15:21
O piloto de motos monfortino Eduardo Iglesias, con patrocinio da Deputación de Lugo, confía en "chegar á meta" no rally Dakar, que se celebra en Arabia Saudita, e mellorar a clasificación do pasado ano, cando acabou no posto 76.
Xunto co presidente da Deputación de Lugo, José Tomé, presentouse este xoves, fronte ao Pazo de San Marcos, a moto e o piloto que competirá nunha das probas "máis duras" do mundo, nesta especialidade deportiva.
Iglesias concretou que esta será a súa cuarta participación e argumentou que "o obxectivo segue sendo o destes últimos anos, que é concluír coa proba máis dura do mundo que é o Dakar".
"Imos tentar mellorar, o ano pasado non puido ser e o obxectivo é chegar á meta, representando neste caso a todos os lucenses e mellorar a clasificación", subliñou.
Pola súa banda, o presidente provincial destacou a importancia de contar cunha persoa de Lugo representando á provincia varias veces. "Leva tres veces e cada vez mellorando o seu resultado", celebrou. "Na Deputación colaboramos con estes eventos que levan o nome da provincia polo mundo adiante", reivindicou o presidente da Deputación de Lugo.
A proba arrinca o un de xaneiro de 2023, aínda que Eduardo Iglesias xa partirá para Arabia o 27 de decembro, e xa o 31 celebrarase a etapa prólogo. Para esta edición contarase con dous días máis de carreira, ata completar 14 etapas. "Vai ser un Dakar máis duro que outros anos", presaxiou finalmente o piloto monfortino.
