Destrúen unha bengala de marcación militar localizada en Porto do Son
O día de Nadal un veciño desta localidade que paseaba pola praia veu o artefacto e informou á Garda Civil do achado.
Por Europa Press / Redacción | SANTIAGO DE COMPOSTELA | 27/12/2022 | Actualizada ás 17:55
Integrantes da Unidade de Mergullo da Armada en Ferrol (Ubufer) destruíron na tarde noite do pasado domingo, 25 de decembro, unha bengala de marcación militar que foi achada nunha praia da localidade coruñesa de Porto do Son.
Foi un Grupo de desactivación de explosivos (Gede) da unidade con sede en Ferrol, que pertence ao mando da Forza de Acción Marítima en Ferrol (Marfer), a que levou a cabo esta intervención sobre unha bengala modelo MK-25 que se atopaba pousada na area da praia do dique.
O día de Nadal un veciño desta localidade que paseaba pola praia veu o artefacto e informou á Garda Civil do achado.
Deste xeito, activouse o protocolo de actuación para este tipo de intervencións e púxose en coñecemento da Armada, responsable da resolución deste tipo de incidentes, a través do Centro de Operacións e Vixilancia de Acción Marítima da Armada (Covam) en Cartaxena (Murcia), en coordinación coa Comandancia Naval da Coruña.
Nese momento, o almirante de Acción Marítima (Almart), a través do centro situado en Murcia, ordenou destacar un equipo de desactivadores de explosivos submarinos de Ferrol. Os expertos da Armada procederon mediante técnicas específicas á destrución e retirada da mesma.
Durante a operación contouse coa colaboración da Garda Civil, do servizo de emerxencias 112 e da Comandancia Naval da Armada na Coruña, esta última encargada de coordinar os auxilios necesarios ao equipo de desactivadores da Armada que realizaron a intervención.
Tras a destrución da bengala, o equipo da Unidade de Mergullo procedeu á comprobación e recollida dos restos trasladándoos posteriormente á súa base.
