Xinzo, primeiro concello galego en reclamar unha moratoria para os macroélicos
O municipio comprométese a axudar aos colectivos veciñais e ambientalistas para cubrir os custes de eventuais estudos técnicos. O próximo pleno no que se presentará e debaterá a moción será o de Os Blancos.
Por Galicia Confidencial | Xinzo da Limia | 27/12/2022 | Actualizada ás 21:17
O último pleno de 2022 da corporación municipal de Xinzo de Limia, celebrado este martes, acordou unha declaración institucional para botar o freo na proliferación de macroeólicos na comarca da Limia. O texto proposto pola plataforma Stop Eólicos Xurés-Celanova e polo Club Parapente Baltar saíu aprobado cos votos a favor de todos os grupo de goberno que preside Elvira Lama: PSOE, AXIL, BNG e o concelleiro Manuel Pérez Campos, e coas abstencións do grupo popular e a concelleira non adscrita Montse Lama.
No texto aprobado, a corporación municipal de Xinzo de Limia," atendendo á falta de evidencia científica sobre as ameazas reais para o medio ambiente e a saúde das persoas e tendo en conta o principio de precaución", acorda solicitar da Xunta de Galicia e do Goberno do Estado a aplicación inmediata dunha moratoria sobre os proxectos de instalación de centrais eólicas en trámite.
Tamén reclama unha moratoria sobre outros que puideran solicitar a súa tramitación no futuro e que afectan ao territorio da comarca da Limia mentres o Plan Sectorial Eólico de Galicia non se someta a unha avaliación ambiental estratéxica tal e como esixe a lei, ou se aprobe un novo Plan Sectorial Eólico”.
AXUDA AOS COLECTIVOS E VECIÑOS AFECTADOS
Na mesma moción tamén se instaba ao goberno municipal de Xinzo de Limia a encargar estudos técnicos sobre o proxecto da liña de evacuación eléctrica do parque eólico San Martiño LAT 132 kV SET PE San Martiño-SET Larouco (expediente IN408A 2021/043) e o proxecto parque eólico Tramontana (expediente IN408A 2021/030), que afectan ao territorio deste concello. Deste xeito, o Concello de Xinzo de Limia comprométese a axudar aos colectivos veciñais e ambientalistas para cubrir os custes de eventuais estudos técnicos que permitan confrontar argumentos cos estudos que elaboran especialistas para xustificar os plans das grandes corporacións.
O próximo pleno no que se presentará e debaterá a moción será o de Os Blancos. A sesión, pública, terá lugar na Casa do Concello dos Blancos este xoves e será defendida pola portavoz do PSOE nunha sesión que o alcalde tivo que convocar de urxencia dada a alarma social suscitada polo proxecto de Greenalia denominado Lamas II e que está en exposición pública até o día 4 de xaneiro.
Stop Eólicos Xurés Celanova recolleu xa máis de 500 alegacións contra este proxecto que serán rexistradas esta semana na sede da Xunta de Galicia en Ourense.
