Recoñecemento para 25 servizos do Sicted 'Ourense Termal' co distintivo 'Compromiso de Calidade Turística'

Un total de 25 empresas e servizos do destino Sicted (Sistema Integral de Calidade Turística en Destinos) 'Ourense Termal' recibiron o distintivo de 'Compromiso de Calidade Turística', unha convocatoria anual da Secretaría de Estado de Turismo.

Así o acordou o comité nacional de Sicted, que recoñece iniciativas públicas e privadas da provincia ourensá, entre eles aloxamentos, centros de interpretación, balnearios, clubs náuticos, adegas, museos, salas de exposición e servizos de benestar, entre outros.

O presidente da Deputación, Manuel Baltar, destaca que esta distinción supón "un aval para o desenvolvemento continuo e a competitividade dos negocios seleccionados".

Pola súa banda, a xerente do Instituto Ourensán de Desenvolvemento Económico (Inorde), Emma González, celebrou que este distintivo significa que van "polo bo camiño", xa que as 25 iniciativas distinguidas foron previamente elixidas pola Mesa de Calidade do plan 'Ourense Termal', constituído pola Deputación en novembro.

Tras o fallo desta convocatoria, o Inorde organizará un acto de entrega destes distintivos que lucirán nos respectivos establecementos.

Auga quente procedente da xeotermia nas termas de Outariz, preto da cidade de Ourense | Fonte: galiciaunica.es