A produción industrial galega cae en novembro tres décimas menos que a media nacional, ata o 1,5%
A produción da industria enerxética foi a que máis baixou en novembro
Por E.P. | SANTIAGO DE COMPOSTELA | 11/01/2023 | Actualizada ás 11:03
O Índice Xeral de Produción Industrial (IPI) caeu en Galicia un 1,5% en decembro, se se compara co mesmo mes de 2021, segundo datos publicados este mércores polo Instituto Nacional de Estatística (INE), recollidos por Europa Press.
Este dato supón un descenso inferior ao rexistrado polo total de España, xa que a nivel nacional a produción industrial botou o freo tras seis meses de ascensos e baixou un 1,8% no undécimo mes de 2022. Ata novembro, este índice caeu un 1,9% en Galicia, a pesar de que a media estatal é positiva, cun +2,8%.
DATOS NACIONAIS
A nivel nacional, o IPI baixou un 1,8% interanual o pasado mes de novembro, rexistrando así o seu maior descenso desde outubro de 2021, cando retrocedeu un 3,1%, sempre segundo cifras do INE.
Coa caída de novembro, a produción industrial pon fin a seis meses consecutivos de ascensos interanuais. A taxa do penúltimo mes de 2022 foi case catro puntos inferior á de outubro, cando este indicador subiu un 2,1%.
A produción da industria enerxética foi a que máis baixou en novembro, ao rexistrar un retroceso interanual do 9,8%. Séguenlles os bens de consumo duradeiro (-6,3%); os bens intermedios (-2,9%) e os bens de consumo non duradeiro (-2,1%). O único sector que incrementou a súa produción en novembro de 2022 foi o dos bens de equipo, cun repunte do 7,3% respecto ao mesmo mes de 2021.
Por ramas de actividade, as que máis incrementaron a súa produción en taxa interanual foron outras industrias extractivas (+39%); industrias extractivas (+37,7%); a fabricación de material e equipo eléctrico (+16,8%) e a fabricación de vehículos de motor (+15,3%). Entre os descensos, os máis acusados rexistráronse na confección de pezas de vestir (-27,1%), a industria da madeira e a cortiza (-23,8%) e as artes gráficas (-13,4%).
