Rueda esixe o cesamento da secretaria de Estado de Igualdade pola "burla" sobre a rebaixa de penas da lei do 'só si é si'

O presidente da Xunta, Alfonso Rueda, urxiu a destitución da secretaria de Estado de Igualdade e contra a Violencia de Xénero, Ángela Rodríguez 'Pam', ao considerar que fixo unha "grave burla" sobre a saída de prisión de agresores sexuais despois da entrada en vigor da lei do 'só si é si'. En todo caso, suxeriu que quen tería que "cesala", en referencia ao presidente Pedro Sánchez, "probablemente non poida" facelo.

Nun acto de Podemos celebrado este luns baixo a lema 'feminismo para todo o mundo: Que está a pasar coa violencia machista?', a número dous da ministra de Igualdade ironizou sobre que é o que sucede coa rebaixa de condenas de agresores sexuais que, segundo dixo, "é o que nos está botando a extrema dereita á cara".

Así, entre risas, a secretaria de Estado afirmou que "dos creadores de 'as persoas van ir ao rexistro para cambiar de sexo todas as mañás', chega 'os violadores á rúa', centos, miles, ondas".

A preguntas dos medios tras a reunión semanal do seu Goberno, Rueda considerou a intervención da dirixente unha "burla especialmente grave".

Ao seu modo de ver, a redución de penas que se está dando nalgúns casos pode causar "pena ou indignación" pero "non risa". "E moito menos da máxima responsable de garantir a igualdade real en España desde o punto de vista das políticas públicas", apostilou.

Rueda censurou que á secretaria de Igualdade lle poida parecer "gracioso" que "a 150 delincuentes" condenados por delitos de agresión sexual se lle reduzan as penas, e concluíu que "debería ser cesada por quen a nomeou". "O problema é quen a nomeou probablemente non poida cesala", resolveu.

O presidente da Xunta, Alfonso Rueda, antes da rolda de prensa do Consello | Fonte: Xunta de Galicia