Presentan denuncia penal contra altos cargos da Xunta por non declarar a caducidade da mina de Varilongo

A Federación galega de Ecoloxistas en Acción ven de interpor nos xulgados de Santiago denuncia penal contra varios altos cargos da Consellería de Economía, Empresa e Innovación por non proceder a declarar a caducidade das concesións da mina de Varilongo, en Santa Comba.

A mina de estaño e volframio, propiedade da mesma empresa australiana que pretende reabrir as minas de San Finx, abandonouse en 1986, fai máis de 30 anos. A pesar da tentativa de converter a explotación subterránea nunha gran mina a ceo aberto, os funcionarios da Xunta informaron que debía procederse a declarar a caducidade das concesións.

E é que, como lembran desde a organización ecoloxista nun comunicado, o propio Tribunal Supremo estableceu que a declaración de caducidade dunha concesión mineira é un acto que non é discrecional e debe adoptarse obrigatoriamente, baixo pena de responsabilidade, se se dan os presupostos previstos pola lei.

O feito de que os altos cargos denunciados, denunciando os informes previos, non teñan declarado a caducidade podería ser, para Ecoloxistas en Acción, indiciario dun ou varios delitos de prevaricación. "Non é o único favor que a Xunta lle fixo á mineira australiana en Santa Comba, pois deixou caducar un procedemento sancionador por vertidos de metais pesados que implicou a contaminación de ríos próximos, presentando estes valores de cadmio centos de veces superiores aos máximos permitidos", critica a entidade.

A propia Xunta aprobara en 2011 un plan de explotación para a mina de Varilongo, que non foi sometido a avaliación de impacto ambiental, a pesar de que tres informes dos funcionarios enxeñeiros de minas indicaban que isto era necesario. Tampouco se someteu a participación pública o plan de restauración, cun irrisorio orzamento de 53.000 euros, cando o custo real de restauración será de varios millóns. Precisamente por estes motivos, Ecoloxistas en Acción pedirá tamén ante a ONU o próximo 22 de marzo que se dictamine que foi vulnerada a Convención de Aarhus tanto neste proxecto como no de San Finx.

Por iso, desde a organización ecoloxistas demandan á Xunta que se obrigue á empresa australiana a constituír un aval de como mínimo 5 millóns de euros para garantir a restauración, peche e clausura da mina en condicións de seguridade, e advirten que en caso contrario demandarán que os altos cargos responsables que agora ven de denunciar respondan co seu propio patrimonio persoal