Científicos galegos traballan no maior acelerador de partículas do mundo
Un terzo do persoal investigador do Instituto Galego de Física e Altas Enerxías está vinculado ao CERN europeo
Por Europa Press / Redacción | Galicia | 13/03/2023 | Actualizada ás 17:20
O conselleiro de Cultura, Educación, FP e Universidades, Román Rodríguez, visitou este luns a sede da Organización Europea para a Investigación Nuclear (CERN), na cidade suíza de Xenebra, para coñecer o traballo dun grupo de científicos do Instituto Galego de Física de Altas Enerxías (Igfae) neste centro que alberga o maior acelerador de partículas do mundo.
Román Rodríguez fixo un percorrido polas instalacións, nas que lle explicaron o funcionamento da máquina e a importante función que desenvolve o centro, á vez que mantivo un encontro cos científicos galegos para coñecer os proxectos de investigación universitaria que desenvolven.
O Igfae, un centro mixto da Xunta e a USC, é un dos oito integrantes da Rede de Centros de Investigación de Galicia e creouse en 1999 para coordinar a participación da comunidade española de física de partículas no CERN.
No caso concreto de Xenebra, froito desta colaboración, unha parte dos investigadores deste centro realizan fisicamente o seu traballo na cidade suíza, mentres que outros o fan a distancia, desde Santiago de Compostela, compaxinando con visitas regulares ao país para a súa participación en proxectos nucleares de ámbito internacional.
"MOI ORGULLOSO" DOS GALEGOS
O conselleiro de Cultura, Educación e Universidades dixo sentirse "moi orgulloso" do labor destes científicos, da súa contribución ao avance social e tamén "da súa maneira de facer país desde a investigación máis punteira".
Ademais, reivindicou que a colaboración entre o Igfae e o CERN "é a proba evidente do grandísimo nivel" das universidades e centros de investigación de Galicia.
