O PSdeG critica que a política financeira da Xunta faga "seguidismo" das decisións de Ayuso e Moreno

O secretario xeral do PSdeG, Valentín González Formoso, criticou que a presidenta da Comunidade de Madrid, Isabel Díaz Ayuso, e o titular da Xunta de Andalucía, Juan Manuel Moreno, fixen a política financeira galega.

O xefe de filas dos socialistas galegos pronunciouse deste xeito en referencia ao anuncio feito o xoves polo presidente da Xunta, Alfonso Rueda, de interpor un recurso de inconstitucionalidade contra o imposto ás grandes fortunas.

Nunha rolda de prensa ofrecida este venres xunto ao alcalde de Santigo de Compostela, Xosé Sánchez Bugallo, e a edil Mercedes Rosón, Formoso censurou que o Goberno galego volva facer "un seguidismo das decisións que se marcan desde Xénova".

Tras lembrar que Rueda tamén acordou recentemente "baixarlle o imposto aos que teñen máis dun millón de euros", o secretario xeral do PSdeG considerou que este recurso non é unha "sorpresa" e considerou unha "pena" que "quen fixe a política tributaria en Galicia teña que ser Ayuso e Juanma Moreno".

"Esta decisión esconde un clasismo andaluz claro. Que teñamos que compartir aquí en Galicia baixarlle os impostos aos señoritos andaluces vai en contra dun pobo galego que é solidario e que sabe que cando veñen mal dadas quen máis ten debe solidarizarse con quen menos ten", dixo.

O secretario xeral do PSdeG, Valentín González Formoso, en rolda de prensa | Fonte: Europa Press