Suspendido o xuízo contra Baltar por que o seu avogado decidiu non comparecer
O letrado tentara xa suspender o xuízo este luns a través dun escrito.
Por Europa Press / Redacción | ZAMORA | 09/05/2023 | Actualizada ás 13:57
A incomparecencia do letrado do presidente da Deputación de Ourense, Manuel Baltar, obrigou este martes a suspender o xuízo que está previsto celebrar no Xulgado de Primeira Instancia e Instrución de Poboa de Sanabria, na provincia de Zamora, onde o líder provincial dos populares ourensáns debía responder dun suposto delito contra a seguridade viaria.
Aínda que o avogado do dirixente do PP tentara o luns, sen éxito, que o xuíz suspendese a vista alegando un señalamento anterior, finalmente esta non chegou a celebrarse nin sequera por medios telemáticos, opción que fora ofrecida polo xulgador, debido á non comparecencia do defensor, segundo a información do gabinete de prensa do Tribunal Superior de Xustiza de Castela e León recollida por Europa Press.
Ante esta situación, as mesmas fontes apuntan que o xulgado procederá a fixar un novo señalamento. A comparecencia estaba prevista a partir das 9,30 horas de forma telemática ante o xulgado, onde Baltar ten abertas unhas dilixencias por un delito contra a seguridade viaria nas que figura como investigado.
