Case a metade dos rexedores cesados en mocións de censura no anterior mandato poderán volver á alcaldía

Catro dos nove alcaldes cesados en mocións de censura no último mandato municipal poderán volver á alcaldía tras mellorar os seus resultados nas eleccións deste domingo. Trátase dos que fosen rexedores da Baña, Sada, na Coruña; e Ribadavia e Viana do Bolo, en Ourense. Na Baña, o socialista José Pereira Gil podería recuperar o bastón de mando tras lograr cinco edís, un máis. Así, de chegar a un acordo co BNG (1 concelleiro) obtería a maioría absoluta fronte ao PP de José García Cardeso, que se mantén nos cinco concelleiros.

En Sada, a cabeza de lista de Sadamaioría e exalcalde Benito Portela obtén un concelleiro máis, ata os sete, sendo a candidatura máis votada. Portela podería sumar os apoios do BNG (un concelleiro) e do PSOE (outro edil) fronte á candidata de Unidos por Sada e actual alcaldesa en funcións, María Nogareda, que se fai con catro edís. Pola súa banda, o PP obtén outro catro.

En Ribadavia, o popular César Fernández Gil volverá á alcaldía ao lograr a maioría absoluta e pasar de cinco a sete concelleiros. Pola súa banda, a actual alcaldesa e candidata do PSOE, Noelia Rodríguez, perde un concelleiro e sitúase en tres. Ademais, o Bloque consegue dous edís e Ribeiro en Común un.

En Viana do Bolo, a subida en apoios do actual alcalde, o popular Andrés Montesinos, que pasa de catro a cinco concelleiros, non lle chega para alcanzar a maioría absoluta. Así as cousas, o nacionalista Sencundino Fenrández podería volver facerse co mando se a súa formación, que logra tres concelleiros, logra o apoio do PSOE, que obtén outro tres.