Baltar liderará o comité de campaña do PP en Ourense e ten previsto acudir ao acto do domingo con Feijóo
O candidato nas municipais, Manuel Cabezas, será o responsable de Ourense cidade.
Por E.P. | OURENSE | 08/06/2023 | Actualizada ás 19:07
O presidente provincial do PP en Ourense, Manuel Baltar, será o responsable político do comité de campaña para o 23J que coordinará a secretaria provincial, Ana Villarino; e no que Jorge Pumar figura como responsable de actos públicos; mentres que o presidente do Parlamento, Miguel Santalices, encargarase dos actos sectoriais.
Presidido por Baltar, o comité executivo reuniuse para nomear aos 25 membros do comité de campaña que se encargará da organización dos actos que se desenvolverán na provincia no marco das eleccións xerais do próximo 23 de xullo.
Nun comunicado, o dirixente provincial reivindicou ao PP como "única garantía de estabilidade" e augurou que España recuperará "o goberno que merece da man" de Alberto Núñez Feijóo. Con el e co líder do PP galego, Alfonso Rueda, estará no acto previsto o domingo no Multiusos do Sar compostelán, ao que prevé acudir.
"Esta cita será unha nova demostración de forza do PP e un novo paso cara á vitoria do 23 de xullo", aseverou, ademais de remarcar que o PP de Ourense activa a súa maquinaria electoral para "alcanzar un resultado histórico" e contribuír á chegada de "un ourensán" á Moncloa.
"A mobilización será completa porque o 23 de xullo xogámonos moito. E o PP de Ourense responderá como sempre: cun enorme traballo que culminará cunha gran vitoria electoral que contribuirá a situar a un ourensán como Alberto Núñez Feijóo como próximo presidente de España", aseverou.
Entre os 25 membros do comité de campaña ourensán, figuran tamén Miri Barreira como responsable de campaña; Ana Belén Vázquez como responsable do voto exterior; e Marta Nóvoa, responsable de campaña de dirixentes autonómicos. Así mesmo, o candidato nas municipais, Manuel Cabezas, será o responsable de Ourense cidade.
