Aumenta a poboación de tartaruga europea no Parque natural de Corrubedo
Esta especie figura como "en perigo de extinción" no Catálogo galego
Por E.P. | SANTIAGO DE COMPOSTELA | 10/06/2023 | Actualizada ás 14:29
Un proxecto impulsado pola Xunta para o seguimento da tartaruga europea no Parque natural complexo dunar de Corrubedo e lagoas de Carregal e Vixán permitiu constatar avances na consolidación e crecemento das poboacións desta especie nas dúas charcas nas que está presente.
Así o explicou este sábado a conselleira de Medio Ambiente, Territorio e Vivenda, Anxos Vázquez, que visitou este espazo natural para comprobar 'in situ' o hábitat natural destes réptiles, que figuran como "en perigo de extinción" no Catálogo galego de especies ameazadas.
Segundo trasladou a Xunta, os labores de seguimento da tartaruga no parque natural comezaron o pasado outono, coa recollida sobre o terreo dos datos basee de partida, e esta primavera realizáronse novas mostraxes para completar a información.
Á vista dos resultados, indicou, confirmouse que a poboación de tartarugas das dúas charcas de Olveira nas que están asentados mostran síntomas de crecemento. En concreto, detectáronse 16 exemplares novos en 2022 e outro seis máis nas mostras realizadas desde abril deste ano. Ademais, a taxa de supervivencia estimada é dun 90% anual, valor que se considera elevado para esta especie.
"BOA SAÚDE"
Por este motivo, a conselleira destacou que os datos recompilados no marco do proxecto para o seguimento da tartaruga europea en Corrubedo --financiado con fondos europeos do Next Generation-- permiten concluír que este réptil goza "de boa saúde" no parque natural, á vez que puxo en valor a importancia das poboacións existentes en Ribeira para garantir a conservación da especie no conxunto de Galicia.
Para facer as mostraxes os expertos da UVigo aplicaron nasas cebadas na charca de Olveira e en dúas próximas máis pequenas. Unha vez capturados, a cada individuo fíxoselle unha ficha completa e procedeuse á súa marcaxe cun transportador integrado pasivo para garantir o seu seguimento a longo prazo. Ademais, tamén se tomaron mostras de sangue para facer as análises xenéticos correspondentes e cuxas conclusións serán de utilidade para garantir a súa preservación.
