A UXT vincula a supresión de prazas de educador no centro de menores Avelino Montero á súa privatización

O secretario intercomarcal de UXT Pontevedra, Deza e Arousa, Ramón Vidal, denunciou este luns a supresión de catro prazas de educadores no centro de reeducación de menores Avelino Montero, algo que ve "unha manobra Consellería de Política Social e Xuventude, para que a xestión se privatice", como xa sucede nos outros tres centros tutelares destas características.

Nunha rolda de prensa, Ramón Vidal, asegurou que a consellería "non vai cubrir o catro prazas de educadores que se xubilaron recentemente" no Avelino Montero e que a partida económica correspondente está a destinarse a dous equipos multidisciplinares con sede en Vigo nos que se elimina a figura do educador.

Segundo os datos ofrecidos por UXT, a día de hoxe este centro pontevedrés está en obras e só conta con 6 menores, aínda que se elevará a 30 a capacidade total deste espazo de réxime aberto destinado a menores que deben cumprir medidas xudiciais.

UXT convocou unha concentración para este martes 13, ás 12,00 horas, diante do Avelino Montero para protestar contra esta decisión. Ademais, para o 15 de xuño está prevista unha reunión coa Subdirección Xeral de Persoal da Consellería de Política Social para tratar a modificación parcial da relación de postos de traballo (RPT).

A XUNTA RECOÑECE A AMORTIZACIÓN

Pola súa parte, a Xunta de Galicia asegurou este luns que non suprimirá ningún emprego no centro de reeducación de menores Avelino Montero e que, ao contrario, si reforzará os equipos técnicos de menores da provincia de Pontevedra coa creación de novas prazas ou "amortizará" outras non ocupadas.