O PSdeG acusa a Feijóo de crer na igualdade "pola mañá" e xustificar a violencia de xénero "pola tarde"

O PSdeG denunciou as "contradicións" do líder do Partido Popular, Alberto Núñez Feijóo, ao que acusan de "crer na igualdade pola mañá" mentres "xustifica a violencia de xénero" e "pacta con negacionistas e misóginos pola tarde".

Así o manifestou nun comunicado remitido aos medios a secretaria de Igualdade do PSdeG, Silvia Fraga, tras a reunión do grupo de traballo de igualdade da formación.

Silvia Fraga tamén criticou as declaracións en de Feijóo nas que se refería a a condena do líder valenciano de Vox por violencia de xénero e aseguraba que tivera "un divorcio duro". Tras cuestionar que Feijóo "asimile que lle peguen unha malleira ou maltraten psicoloxicamente a unha muller cun divorcio duro", a socialista sostivo que "de mulleres que pasaron por divorcios duros están cheos os cemiterios".

As responsables en materia de igualdade do PSdeG reuníronse este xoves para preparar as achegas ao novo marco normativo galego en materia de igualdade en tramitación no Parlamento de Galicia.

Respecto diso, Fraga reiterou a necesidade desta actualización para adaptalo "ás novas realidades e tamén melloralo" e remarcou que na actualidade o Goberno galego só está a facer unha "declaración de intencións" que se traduce en "mera propaganda". Por iso, advertiu que o PSdeG non será cómplice nin contribuirá ao "lavado das vergoñas do PP, auspiciadas polo seu líder, Feijóo".

Reunión das representantes de igualdade do PSdeG. PSDEG | Fonte: Europa Press