'Os do non', lema fraguista aínda lembrado, volve ao Hórreo con PP e oposición en pugna por colocar o mote ao rival
O primeiro debate de política xeral da lexislatura evidencia a distancia entre os grupos, aínda que houbo acordos puntuais.
Por Europa Press / Redacción | SANTIAGO DE COMPOSTELA | 25/04/2025 | Actualizada ás 19:14
'Os do non', o lema que en época de Manuel Fraga se escoitaba a miúdo dentro do Pazo do Hórreo e que os populares utilizaban entón para hostigar ao BNG regresou con forza ao hemiciclo galego máis de 20 anos despois. E é que, máis aló dos anuncios do presidente, Alfonso Rueda, e dalgúns acordos, o primeiro Debate sobre o Estado da Autonomía desta lexislatura converteuse nunha pugna entre PPdeG e os seus rivais políticos por colocarse o apelativo.
Nun contexto político que sitúa a un PPdeG con maioría absoluta e un Bloque en máximos históricos, o PP de Rueda xa resucitou meses atrás o alcume para atribuírllo aos de Ana Pontón. Pero, un ano despois das autonómicas nas que os populares revalidaron a maioría absoluta, resoou máis forte que nunca no Parlamento. Se o PP, con Rueda á fronte, cargou contra a oposición como os "do non a todo" (sobre todo coa lupa no BNG, pero ampliou o cualificativo ao PSdeG), os seus rivais políticos buscaron o efecto búmeran. Verbalizouno este venres Olalla Rodil, viceportavoz nacionalista na Cámara, ao lembrar ao PP que "vetou todas" as propostas da formación.
"É o que goberna o que debe ter xenerosidade, pero vostedes aplicaron o seu rodete absolutista", queixouse. Unha protesta que reproduciu a socialista Elena Espinosa, que interveu como viceportavoz socialista nun debate de política xeral no que os populares alcanzaron só dous acordos cos socialistas. "Quixemos achegar as nosas transaccións, pero no canto de atopar a un partido de goberno da Xunta, atopamos ao partido da confrontación. Porque vostedes, señores do PP, son o partido do non", sentenciou Espinosa.
"OS DO NON E OS DO TAMPOUCO'
En fronte, nun salto temporal de máis dun par de décadas, pero ao estilo dun dos conselleiros de Fraga ao que máis se ouvía usar 'os do non', saíu a repartir respostas a número dous de Rueda no partido e viceportavoz do Grupo Popular, Paula Prado, que non escatimou. "Temos ao Bloque Negacionista Galego e ao Partido Seguidista de Galicia. Son os do non e os do 'tampouco'", espetou, mentres mostraba un folio co logotipo alterado dos socialistas. Antes afanouse en censurar a oposición a Altri dos nacionalistas, sen esquecer polo camiño a Greenpeace, a plataforma Ulloa Viva ou o actor Luís Zahera, quen anos atrás protagonizou un vídeo do Nadal no que intérprete se converteu no seu dobre. Agora en redes pódese ver un vídeo seu no que carga contra o proxecto da pasteira lusa en Palas de Rei.
"Luís Zahera, gañador de dous Goya, e nomeado a un máis polo seu traballo A miña terra Galicia está en perigo", ironizou Prado, antes de engadir: "O que digan estes ecoinfluencers ten que valer máis que os informes de 34 técnicos da Xunta". Tamén atacou ao BNG pola queixa que manifestou na Mesa relativa a uns acordos do PP con outras forzas que, a xuízo dos nacionalistas, non se axustaban ao regulamento da Cámara autonómica. "Nestes momentos a oposición confórmana os do non e os pagafantas dos do non. É unha pena, pero non hai máis", sentenciou, antes de dirixirse ao líder do PSdeG, José Ramón Gómez Besteiro, quen acudiu á última gran protesta contra Altri, para darlle un consello: "Teña coidado porque calquera día unha punta desas estrelas vermellas (das 'estreleiras' do BNG) pode infectarlle o virus nacionalista".
DIFERENZAS MARCADAS E ALGÚN CONSENSO PUNTUAL, COMO EDIXGAL
A pesar de que as diferenzas quedaron patentes, e se recrudeceu o enfrontamento entre PP (co que o propio Rueda foi moi duro no seu discurso do mércores) e un BNG que tampouco escatimou en descualificar ao máximo mandatario autonómico e ao seu partido, houbo algún espazo para o acordo e algún consenso de certa relevancia social como o selado entre populares e socialistas para "redefinir" o polémico Edixgal. Non foi posible con Altri e tampouco en relación á quita da débeda, a pesar de que marcou as negociacións previas das propostas de resolución, e populares e nacionalistas si revalidaron un acordo sobre financiamento alcanzado na cita de política xeral de 2023. O PSdeG descolgouse ao velo desfasado.
Dalgún modo, xunto cos populares, que teñen o primeiro posto en propostas aprobadas garantido pola súa maioría absoluta, o gran vencedor en termo numérico foi o único deputado que ten o partido de Gonzalo Pérez Jácome, Democracia Ourensana (D.O.), no Parlamento, Armando Ojea, con quen os populares chegaron a máis acordos. Dous días antes, Rueda deixara anuncios en materia de vivenda e tamén no ámbito social, como construír 24 novas residencias de maiores fóra das cidades, e unha nova dedución pola compra de libros de texto e material escolar.
CARAVEIS NOS ESCANOS DO BNG
Fronte á foto máis institucional da tribuna e á presenza de cargos do mércores, este venres de votacións deixou pouca cor nunha sesión á Rueda chegou xa avanzada, unha ausencia que lle valeu algún 'tirón de orellas' por parte dos seus rivais. Na escasa tonalidade que puido haber no hemiciclo predominou o vermello dos caraveis que, en conmemoración da portuguesa Revolución dos Caraveis do 25 de abril de 1974, levaron os deputados nacionalistas aos seus escanos, un xesto habitual. Armando Ojea recibiu un de agasallo.
