Fillas de Cassandra, Leria, Deus Ke Te Crew e Grande Amore entre os artistas do vindeiro Festigal
A programación vai dirixida a todos os públicos e contará cunha zona de acampada e oferta gastronómica.
Por E.P. | SANTIAGO DE COMPOSTELA | 05/07/2023 | Actualizada ás 19:52
O Festigal, promovido por Galiza Nova e a Fundación Galiza Sempre, presentou, este mércores, o seu cartel para a edición deste ano, que contará con actuacións na noite do 24 de xullo de Fillas de Cassandra, Leria, Deus Ke Te Crew e Grande Amore.
Segundo informou a organización, o evento celebrarase no Campus Vida de Santiago. Ademais, o 25 de xullo haberá concertos de Escaravellos, O Ravelo e Dj Misa, así como unha "ampla lista de actividades" para dar a coñecer novas iniciativas artísticas de creadores de Galicia.
Así mesmo, haberá presentacións de libros, postos de artesanía e talleres infantís, entre outras actividades. A programación vai dirixida a todos os públicos e contará cunha zona de acampada e oferta gastronómica.
A organización sinalou que esta é "unha oportunidade para escoitar e gozar da música galega, da cultura e da lingua", feito que tacharon de "clara contraposición ao nulo fomento da música en galego que fai a Xunta de Galicia con axudas millonarias a festivais onde as artistas galegas non representan máis que un 5%".
