Os servizos de urxencia de Galicia iniciarán o programa de detección precoz do VIH
O obxectivo xeral do programa é diminuír o atraso diagnóstico do VIH fomentando a súa detección precoz en determinadas situacións de risco.
Por E.P. | SANTIAGO DE COMPOSTELA | 06/07/2023 | Actualizada ás 18:55
O Consello da Xunta abordou, este xoves, un informe da Dirección Xeral de Saúde Pública da Consellería de Sanidade sobre a inminente posta en marcha do novo programa 'Urxencias Vihxia' nos 14 hospitais públicos e no hospital Povisa de Vigo. O obxectivo é incrementar a detección temperá desta enfermidade.
Os servizos de urxencia dos hospitais xogan un papel importante na detección precoz do VIH xa que atenden a moitas persoas con situacións que son indicativas da infección ou que comparten a mesma vía de transmisión.
O obxectivo xeral do programa é diminuír o atraso diagnóstico do VIH fomentando a súa detección precoz en determinadas situacións de risco. Así, persegue a homoxeneidade en todos os servizos de urxencias dos hospitais públicos do Sergas, do proceso para o cribado oportunista e VIH e das canles de derivación para a detección precoz de casos en determinas situacións de maior prevalencia.
PÚBLICO OBXECTIVO E PROCESO
O público obxectivo son as persoas que acoden a consulta de Urxencia e cumpren cos requisitos de ser maior de 16 anos e non ter un diagnóstico previo de VIH. Ademais, terán que atoparse en situacións de pneumonía adquirida na comunidade (NAC) menores de 65 anos, herpes zóster (HZ) menores de 65 anos, síndrome mononucleósica, infeccións de transmisión sexual (ITS), profilaxis postexposición (PPE) ou práctica do chemsex.
As persoas que teñan un resultado positivo serán citadas en axendas específicas de cribado do servizo de asistencia correspondente, sen demora, para garantir un dos obxectivos desta estratexia que é conseguir que entre o diagnóstico e o inicio do tratamento non pasen máis de 21 días.
Os procesos incluirán a entrevista do paciente e a realización de probas analíticas necesarias e fomentarase realícense nun único acto para facilitar a adherencia ao proceso. Ademais, cada área sanitaria contará cun coordinador responsable deste programa de cribado, tanto en Urxencias como no servizo asistencial que corresponda.
