A Xunta recorrerá ante o TC a Lei de Vivenda de Sánchez se non abre unha comisión bilateral
Considera que invade as súas competencias.
Por E.P. | SANTIAGO DE COMPOSTELA | 13/07/2023 | Actualizada ás 15:22
A Xunta solicitou ao Goberno central a apertura dunha comisión bilateral para tratar de resolver o conflito aberto pola lei estatal de vivenda, que o Executivo autonómico considera que invade as súas competencias.
A petición partiu do Consello da Xunta reunido este xoves, tras o cal compareceu ante os xornalistas o presidente galego, Alfonso Rueda, que comentou que este paso pretende "evitar" a presentación dun recurso de inconstitucionalidade, algo que, como lembrou, xa anunciaron que farán algunhas comunidades autónomas como Andalucía.
Rueda reiterou que o Goberno galego entende necesario abrir este proceso de diálogo despois de que as alegacións presentadas "non fosen tidas en conta" para resolver asuntos dunha lei que, ao seu xuízo, "limita a capacidade das autonomías" á hora de deseñar as súas propias políticas residenciais.
Galicia tamén rexeita que se fixe unha "porcentaxe inamovible" de vivendas que deban dedicarse ao aluguer e pedirá ao Goberno central que concrete o número de vivendas públicas propiedade da Sareb dispoñibles para sacar ao mercado de aluguer despois do "baile de números" que apuntaron as "informacións" xurdidas nos últimos meses.
Segundo o presidente galego, "finalmente" este número de vivendas públicas que poidan destinarse a aluguer redúcese "a 187, das que só 20 están nas cidades" cando, nun primeiro lugar, o Goberno falara "da dispoñibilidade de 1.300" en Galicia.
Así as cousas, Alfonso Rueda espera que as negociacións na comisión bilateral que pide constituír permitan "modificar a lei", xa que, de non ser así, a Xunta dará o paso de presentar o seu recurso de insconstitucional para que a xustiza resolva o conflito.
