Cae unha banda dedicada á 'sextorsión' con ramificacións na Coruña e Valencia
O líder do grupo é un home de 49 anos que dirixía a rede de extorsión desde o seu domincilio na cidade herculina.
Por E.P. | ALICANTE | 25/07/2023 | Actualizada ás 11:34
Axentes da Garda Civil detiveron en Valencia e A Coruña a cinco persoas, tres mulleres e dous homes, aos que lles atribúen a pertenza a unha organización criminal dedicada á 'sextorsión'. Os arrestados supostamente ofrecían citas que nunca chegaban a producirse e reclamaban ao cliente altas cantidades económicas baixo ameaza de facerlles dano a eles ou á súa familia.
A operación, denominada 'Lucrator', iniciouse tras a denuncia dunha vítima no Posto da Garda Civil de San Juan de Alacante e foi desenvolvida pola área de Investigación desa unidade, segundo indicou o instituto armado nun comunicado.
As tres mulleres supostamente publicitábanse por redes sociais ofrecendo encontros sexuais e, cando algún interesado contactaba con elas, entraba en xogo uno dos homes, quen supostamente esixía unha transferencia para o pago dos servizos sexuais.
Os detidos supostamente ameazaban con matar ao 'putero' e á súa familia se non realizaba o pago. Ademais, achegaban ao extorsionado suficiente información persoal para que vise que o tiñan situado: chamábano polo seu nome, sinalaban o tempo que tardarían os sicarios en chegar á localidade onde vivía ou ameazábano co seu traballo ou familia. Isto infundía medo aos prexudicados, que non dubidaban en acceder aos pagos.
Aínda que a cita nunca se materializaba, os detidos primeiro pedían unha cantidade para abonar o tempo perdido da muller que ofrecía os seus servizos. En canto a vítima pagaba, os autores presuntamente reclamábanlle outra cantidade superior para pagar a varios sicarios e así sucesivas reclamacións, ata que o extorsionado xa non podía realizar máis pagos por quedar sen saldo dispoñible. Os detidos chegaron a estafar 11.500 euros a un mesmo prexudicado.
Para dificultar a súa localización, o grupo empregaba unha gran cantidade de números de teléfono e de contas bancarias diferentes. As mulleres ofertaban encontros sexuais e recibían parte do diñeiro estafado, que á súa vez derivaban a outras contas.
AMEAZAS
Pola súa banda, un dos homes era o encargado de materializar as ameazas; mentres que o outro era o líder do grupo, un home de 49 anos, que desde o seu domicilio na Coruña dirixía as funcións do resto.
Todos os detidos posúen antecedentes por feitos similares. As dilixencias foron postas a disposición do Xulgado de Instrución número 5 de Alacante. Durante a operación, bloqueáronse catro contas, e recuperáronse 6.000 euros.
