Máis de 8.000 mozos galegos de 18 anos solicitaron xa o Bono Cultural Mozo

Un total de 170.931 mozos solicitaron o Bono Cultural Mozo ('Bono Cultural Joven') tras a apertura do prazo de solicitude o pasado 13 de xuño, segundo informa o Ministerio de Cultura e Deporte. Deles, 8.053 son galegos. O ministro de Cultura e Deporte, Miquel Iceta, valorou a boa marcha do programa destacando que "a pouco máis dun mes e medio de lanzar a iniciativa, un 35 % dos posibles solicitantes do Bono Cultural Mozo xa o solicitaron".

"Espero que antes de que acabe setembro, todos os que cumpren 18 anos este ano o soliciten, e poidan gozar así das vantaxes de 400 euros destinados ao consumo ou a compra de produtos ou actividades culturais: merece a pena", comentou Iceta, segundo indica o Ministerio nun comunicado.

Ao programa teñen dereito as persoas novas de 18 anos de nacionalidade española, así como aquelas estranxeiras que ostenten residencia legal en España, solicitantes de asilo, desprazados temporais e as persoas estranxeiras ex tuteladas en trámites de obtención do permiso de residencia.

Para poder conseguilo, os mozos interesados deben proceder á súa identificación dixital a través de Cl@ve con rexistro básico (que se pode solicitar e obter por videochamada), Cl@ve con rexistro avanzado (de forma presencial e para aqueles que non cumprisen aínda os 18 anos) ou ben a través do seu Certificado dixital.

O trámite pódese realizar persoalmente ou a través da representación dun adulto, para o que é preciso achegar o formulario de representación descargable na páxina web, correctamente asinado por beneficiario e representante. Nestes casos, o libro de familia non é un documento acreditativo da representación.

Unha moza de 18 anos solicita o Bono Cultural Mozo nunha oficina de Correos de Zaragoza | Fonte: Europa Press