Dúas persoas atrapadas nunha colisión múltiple no Val do Dubra
Por E.P. | SANTIAGO DE COMPOSTELA | 05/09/2023 | Actualizada ás 11:35
Unha colisión múltiple en Val do Dubra deixou a dúas persoas feridas e atrapadas, polo que tiveron que intervir os bombeiros. Concretamente, segundo informou o 112, foron tres os vehículos implicados na colisión, que se produciu na DP-1914, na rúa Entrepotes, ao paso pola citada localidade.
A información sobre este sinistro chegou ao 112 Galicia sobre as 7:30 horas deste martes, mediante as chamadas de alertadores, pero tamén polo sistema ecall dun dos vehículos accidentados.
Deste xeito, activáronse os protocolos de actuación correspondentes para a mobilización dos recursos necesarios: Urxencias Sanitarias de Galicia-061, Bombeiros do Xallas, Garda Civil de Tráfico e o apoio dos voluntarios de Protección Civil da localidade.
Convén indicar que a presenza dos bombeiros respondía á necesidade de liberar aos dous feridos, en vehículos distintos, que estaban, ademais, atrapados dentro dos coches. Unha vez fóra, os afectados foron atendidos polo persoal médico co seu posterior traslado aos centros sanitarios de referencia.
