O galego Jorge Prado, campión do mundo de MXGP, a categoría reina do motocross

O piloto galego Jorge Prado proclamouse este domingo campión do mundo de MXGP, a categoría reina do motocross, despois de gañar a primeira manga do Gran Premio de Italia, celebrada en Maggiora, e convértese no primeiro español que logra o título da categoría. Prado liderou o campionato desde o 11 de marzo, cando arrincou a tempada en Arxentina, e este domingo logrou matematicamente o título tras imporse nunha primeira manga na que lle valía con ser segundo e despois de aproveitar un erro do francés Romain Febvre, o seu principal rival.

O galo sufriu unha caída tentando pasar a un dos seus rivais e rompeu a súa Kawasaki no incidente. Esa rotura evitaba a Prado ter que esperar á última proba en Gran Bretaña. A segunda manga foi un trámite, con Febvre superando ao galego. "É o día máis feliz da miña vida, traballei desde moi pequeno buscando este obxectivo. Foi duro o camiño e longa a espera deste ano, pero conseguímolo e teño que estar moi agradecido á miña familia, a quenes me axudaron desde o principio e á afección que tanto me apoia. Un soño feito realidade!", expresou Prado.

O lucense foi o campión do mundo máis novo da historia, despois de gañar en 2011 o título de 65 c.c. con só dez anos, e tamén o campión de Europa máis precoz, ao facelo con catorce anos. Posteriormente, subiu ao podio no seu primeiro Gran Premio do Mundial con só quince anos. En 2019, con 18 anos, obrigáronlle a cambiar de categoría porque xa gañara os dous títulos mundiais de MX2 permitidos. Actualmente, no seu cuarto ano na categoría reina, xa é o número un mundial.

O piloto de motocross Jorge Prado | Fonte: Red Bull - Arquivo