A Garda Civil ten máis de 5.300 efectivos en Galicia, o maior número da súa historia
No acto da Coruña houbo unha mención de honra ao mérito canino ao can Budy, especialista en detección de drogas.
Por E.P. | SANTIAGO DE COMPOSTELA | 12/10/2023 | Actualizada ás 16:08
A Garda Civil dispón en Galicia do maior número de efectivos da súa historia: máis de 5.300 homes e mulleres aos que o delegado do Goberno, Pedro Blanco, felicitou este 12 de outubro.
Pola súa banda, o delegado reivindicou o compromiso do Goberno coa modernización de servizos e equipamentos, e trasladou ao corpo o recoñecemento polos resultados operativos alcanzados este ano.
Galicia, segundo o Executivo, sitúase como "a terceira autonomía máis segura de España" e alcanza a taxa máis alta de eficacia policial dos últimos nove anos. Blanco pediu á Garda Civil "un esforzo" para loitar contra quen atenta contra a igualdade e, "principalmente, quen exerza, promova ou xustifique calquera violencia contra as mulleres".
Aproveitou así mesmo para trasladar o pésame ás familias dos falecidos este mércores no "tráxico incendio" dun edificio en Vigo.
O ACTO
Ao acto institucional, organizado na Coruña pola xefatura da 15 Zona de Galicia da Garda Civil, asistiu tamén a subdelegada do Goberno na Coruña, María Rivas, entre outras autoridades civís e militares.
Durante o acto impuxéronse cruces das ordes do mérito militar e do mérito da Garda Civil. Tamén unha mención de honra ao mérito canino ao can Budy, especialista en detección de drogas.Foron entregadas bolsas de estudo a fillos de gardas civís con mellor expediente académico e o acto completouse coa homenaxe aos falecidos en acto de servizo.
