Esgotado en menos de dez días o bono Activa Comercio

A cuarta edición do bono Activa Comercio da Xunta permitiu mobilizar preto de 12 millóns de euros en vendas no sector, que esgotou en menos de 10 días o seu orzamento tras a súa activación o pasado 9 de outubro.

Segundo informou o Executivo galego, no programa participaron máis de 6.700 establecementos de todo Galicia e beneficiaron a máis de 124.300 clientes que usaron os bonos.

Así, cada persoa podía descargar un bono de desconto de ata 30 euros para as compras nos comercios adheridos. Unha vez que o importe das rebaixas alcanzou os 2,5 millóns de euros de orzamento destinado os bonos descargados xa non se poden usar.

Por provincias, na Coruña mobilizou preto de catro millóns de euros, coa participación de case 2.500 comercios, e en Lugo as vendas sumaron preto de 1,5 millóns de euros e adheríronse máis de 900 establecementos.

En referencia a Ourense, mobilizaron máis de dous millóns de euros e participaron máis dun milleiro de negocios. Pola súa banda, en Pontevedra sumáronse a esta campaña preto de 2.400 establecementos que mobilizaron máis de 4,5 millóns de euros.

Bono Activa Comercio, Xunta de Galicia | Fonte: XUNTA - Arquivo