Publicada a Resolución definitiva do concurso de traslados do Sergas para persoal sanitario e de xestión e servizos
A categoría con máis adxudicacións é enfermaría, cun total de 388 destinos adxudicados.
Por Europa Press / Redacción | SANTIAGO DE COMPOSTELA | 21/11/2023 | Actualizada ás 12:11
O Diario Oficial de Galicia publica este luns a Resolución da Dirección Xeral de Recursos Humanos do Sergas, pola que se publica a resolución definitiva do ciclo de adxudicación correspondente ao ano 2023 do concurso de traslados aberto e permanente para a provisión de prazas básicas do persoal estatutario sanitario e de xestión e servizos, coa excepción da categoría de médico de familia de atención primaria, cuxo concurso foi resolto mediante a Resolución desta dirección xeral de 29 de setembro de 2023.
Segundo detallou a Consellería, este é o sexto ciclo deste proceso de concurso de traslados aberto e permanente, posto en marcha a finais do ano 2017. En total, participaron neste concurso de traslados 3.260 profesionais pertencentes a 69 categorías de persoal estatutario, resultando adxudicatarios de praza un total de 921 profesionais, o que supón preto do 29% sobre o total de participantes.
Por estamentos, adxudícanse 106 destinos de persoal licenciado sanitario, 507 de persoal diplomado sanitario, 123 de persoal sanitario de formación profesional e 185 de persoal de xestión e servizos. A categoría con máis adxudicacións é enfermaría, cun total de 388 destinos adxudicados. Outras categorías cun número elevado de adxudicacións son: persoal de servizos xerais (88), técnico en coidados auxiliares de enfermaría (80) e grupo auxiliar da función administrativa (56).
Por áreas sanitarias, a da Coruña-Cee; Santiago de Compostela-Barbanza; e a de Vigo son as que incorporarán o maior número de profesionais, cun total de 180, 168 e 142, respectivamente. Do total de participantes, 134 profesionais proceden de fóra de Galicia, e deles 117 son adxudicatarios de praza neste concurso de traslados.
CESAMENTO E TOMA DE POSESIÓN
O persoal que obteña praza neste proceso deberá cesar na que, de ser o caso, desempeñe no Sergas, este mércores, día 22 de novembro. A toma de posesión do novo destino obtido no concurso debe efectuarse dentro dos dous días seguintes ao do cesamento, se a praza desempeñada e a adxudicada son da mesma área de saúde; no prazo de sete días hábiles se as prazas son de distinta área de saúde dentro do Sergas; ou no prazo dun mes se a praza desempeñada corresponde a outro servizo de saúde. Coa publicación desta resolución definitiva e a incorporación dos profesionais aos destinos adxudicados, dáse por finalizado o ciclo anual de concurso de traslados do ano 2023 para o persoal estatutario do Sergas.
