Interceptan dúas veces en Verín a un condutor de 35 anos cun carné falso supostamente expedido en Moldavia
A Garda Civil instruíu dilixencias por dous supostos delitos: un de falsidade documental, que leva prisión de seis meses a tres anos e multa de seis a doce meses; e outro contra a seguridade viaria, que implica de tres a seis meses de cárcere, multa de doce a 24 meses ou traballos en beneficio da comunidade.
Por Europa Press / Redacción | OURENSE | 28/11/2023 | Actualizada ás 16:30
A Garda Civil de Tráfico de Verín investiga a un home de 35 anos de idade despois de ser interceptalo ata en dúas ocasións cun carné falso, supostamente expedido en Moldavia, pero que nunca chegou a sacarse. A primeira vez interceptárono o pasado 3 de novembro, cando ía ao volante dun todoterreo con matrícula portuguesa. Nese momento, identificouse cun permiso de condución moldavo.
Os axentes comprobaron que nas bases de datos oficiais esta persoa xa fora denunciada en anos anteriores por carecer de carné. Así, ao sospeitar que o permiso que presentou podía ser falso ou falsificado, solicitaron a colaboración do Grupo de Investigación e Análise de Tráfico (GIAT) de Ourense.
Tras as pescudas correspondentes, tamén con informes das autoridades moldavas, os axentes determinaron que o carné era falso. O condutor foi denunciado por unha infracción á lei de seguridade viaria. A segunda vez foi o luns desta semana, día 27 de novembro, cando foi interceptado novamente ao volante do mesmo vehículo.
Por todo iso, a Garda Civil instruíu dilixencias por dous supostos delitos: un de falsidade documental, que leva prisión de seis meses a tres anos e multa de seis a doce meses; e outro contra a seguridade viaria, que implica de tres a seis meses de cárcere, multa de doce a 24 meses ou traballos en beneficio da comunidade. Tamén lle foi comisado o permiso de condución para a súa remisión ao xulgado como proba.
