A Reserva de Biosfera promove acabar cos residuos de barcos abandonados na ría de Betanzos
Unha acción incluída no seu Plan de Sustentabilidade Turística, dotado de fondos Next Generation.
Por Europa Press / Redacción | A CORUÑA | 15/12/2023 | Actualizada ás 19:17
A Reserva de Biosfera Mariñas Coruñesas presentou este venres o seu proxecto para a identificación de residuos abandonados na ría de Betanzos e mellora da contorna. Trátase dunha acción incluída no seu Plan de Sustentabilidade Turística, dotado de fondos Next Generation.
O presidente, José Antonio Santiso, detallou a iniciativa xunto co xerente do Plan, Diego López. Por parte da Fundación Juana de Veiga, coa que se realizou o estudo, interveu a técnica Nuria Freire. O proxecto consistiu nun traballo exhaustivo de campo para localizar e catalogar os residuos do estuario, nun territorio que comprende os municipios de Betanzos, Coirós, Paderne, Bergondo, Miño e Sada.
"Estes residuos son principalmente barcos abandonados que prexudican ao ecosistema", segundo explican os promotores do proxecto. En total, identificáronse 46 residuos deste tipo en 16 áreas da ría. En seis delas considérase que a prioridade de intervención é alta ou moi alta. O 54% dos residuos son barcos abandonados non biodegradables, polo que require unha retirada completa. O 24% son pecios integrados como refuxios de biodiversidade, "polo que lles correspondería unha revisión e só a retirada dos elementos que sexan potencialmente contaminantes, mantendo así o casco de madeira".
